9 март бо иштироки Президенти Ҷумҳурии Тоҷикистон Эмомалӣ Раҳмон дар Комплекси давлатии "Кохи Ваҳдат" дар ҷамъомад бахшида ба Солгарди панҷуми Аҳдномаи ризоияти ҷомеа дар Тоҷикистон ширкат намуд.

Зимни суханронии хеш Президенти мамлакат аз проблема ва пешомадҳои Аҳдномаи мазкур ва мавкеъи Шӯрои ҷамъиятии кишвар андешаронӣ намуд.

7 март Президенти Ҷумҳурии Тоҷикистон Эмомалӣ Раҳмон дар Театри давлатӣ-академии опера ва балети ба номи С.Айнӣ дар маҷлиси ботантана бахшида ба иди бонувон ширкат варзид.

Модарону хоҳарони азиз!

Ҳамаи шуморо ба муносибати Рӯзи байналхалқии занон аз самими қалб табрик ва муборакбод гуфта, орзу менамоям, ки ҳамеша рӯзгоратон ободу дилатон шод бошад.

Иди байналхалқии занон аз фаро расидани фасли баҳор —арӯси сол ва эҳёи табиат мужда мерасонад. Дар ин падида як рамзи амиқе ҳаст, ки он ба сиришти неку созанда ва ниҳоди поки модарон алоқаманд аст. Аз ин рӯ, мо ҳамеша ин рӯзи фарҳабахшро бо дилу эҳсоси гарм истиқбол мегирем.

2 март Президенти Ҷумҳурии Тоҷикистон Эмомалӣ Раҳмон директори Хадамоти марзбонии Федератсияи Россия Константин Тотскийро, ки ба Тоҷикистон барои шиносоии бевосита бо фаъолияти марзбонони рус оид ба ҳифзи сарҳади Тоҷикистону Афғонистон омадааст, қабул намуд.

Зимни вохӯрӣ рафти иҷрои ҳуҷҷатҳои байнидавлатии Тоҷикистону Россия оид ба ҳифзи сарҳади давлатӣ, аз ҷумла масъалаҳои ҳамкории ҳарбӣ-техникӣ ва тайёр намудани кадрҳо муҳокима гардиданд.

10 феврал Президенти Ҷумҳурии Тоҷикистон Эмомалӣ Раҳмон маҷлиси васеи Ҳукумати Ҷумҳурии Тоҷикистонро доир намуд.

Дар он танҳо як масъала – натиҷаҳои тараққиёти иҷтимоию иқтисодӣ ва ҷараёни татбиқи ислоҳоти иқтисодӣ дар мамлакат дар давоми соли 2000 ва вазифаҳои соли 2001 мавриди муҳокима қарор дода шуд.

Дар маҷлис инчунин силсилаи масъалаҳои марбут ба кадрҳо муҳокима гардиданд.

7 феврал Президенти Ҷумҳурии Тоҷикистон Эмомалӣ Раҳмон фармонро "Дар бораи Раёсати хизмати давлатии назди Президенти Ҷумҳурии Тоҷикистон", Низомномаи Раёсати хизмати давлатии назди Президенти Ҷумҳурии Тоҷикистонро тасдиқ, теъдоди кормандони Раёсат ва маблағгузории онро муқаррар намуд.

2 феврал Президенти Ҷумҳурии Тоҷикистон Эмомалӣ Раҳмон бо сардори Намояндагии Хазинаи Байналмилалии Асъор Тапио Саавалайнен мулоқот намуд.

Дар ҷараёни мулоқот масъалаҳои марбут ба ҳамкории Ҷумҳурии Тоҷикистон бо Хазинаи Байналмилалии Асъор дар доираи татбиқи лоиҳаҳои маблағгузорӣ, раванди ислоҳоти иқтисодӣ дар мамлакат ва дигар мавзуоти вобаста ба рушду тавсеаи робитаҳои Ҷумҳурии Тоҷикистон бо Хазинаи Байналмилалии Асъор мавриди баррасӣ қарор гирифт.

26 январ Президенти Ҷумҳурии Тоҷикистон Эмомалӣ Раҳмон дар Маҷлиси Шӯрои амнияти мамлакат иштирок ва суханронӣ намуд.

25 январ Президенти Ҷумҳурии Тоҷикистон Эмомалӣ Раҳмон якчанд фармонро дар бораи таъин ва озод намудани роҳбарони мақомоти марказӣ содир намуд.

Аз ҷумла Раҳимов Шариф Махсумович сардори Раёсати навтаъсиси назорати давлатии молиявии назди Президенти Ҷумҳурии Тоҷикистон, Раҳимов Абдураҳим Ҳамроевич Вазири фарҳанг, Ҳамидов Халифабобо вазири адлия таъин гардида, Маҳмадов Бобохон аз вазифаи Вазири фарҳанг, Исмоилов Шавкат Маҳмудович аз вазифаи Вазири адлия озод карда шуданд.

25 январ Президенти Ҷумҳурии Тоҷикистон Эмомалӣ Раҳмон фармонро "Дар бораи қисман тағйир додани сохтори Дастгоҳи иҷроияи Президенти Ҷумҳурии Тоҷикистон" имзо кард.

Ин амал бо мақсади мутобиқгардонии сохтори мавҷудаи Дастгоҳи иҷроияи Президенти Ҷумҳурии Тоҷикистон бо Низомномаи Дастгоҳи иҷроияи Президенти Ҷумҳурии Тоҷикистон, тақвияти назорати фаъолияти молиявӣ, беҳбуди кори баҳисобгирӣ ва ҳисоботи корхонаву ташкилотҳои тобеи Дастгоҳи иҷроияи Президенти Ҷумҳурии Тоҷикистон анҷом дода шудааст.