Имрӯз, бегоҳӣ Президенти кишвар Эмомалӣ Раҳмон барои тамошои бозии футболи дастаҳои мунтахаби миллии Тоҷикистон ва Урдун ба майдони марказии варзишии пойтахт ташриф овард.

Боиси хушнудист, ки футбол дар Тоҷикистон солҳои охир оммавияти васеъ пайдо намудааст, зеро футболбозони дастаҳои алоҳида ва мунтахаби кишвар бозиҳои шавқовар ва натиҷаҳои умедбахш нишон медиҳанд. Ин аст, ки сафи мухлисони футбол ҳам дар Тоҷикистон солҳои охир хеле афзудааст.

Ин ҳолат имрӯз ҳам истисно набуд, зеро майдони марказии варзишии пойтахт, ки дорои беш аз 25 ҳазор ҷойи нишаст мебошад, пур аз ҳаводорони футбол ва мухлисони дастаи мунтахаби Тоҷикистон аст.

Ташрифи Сарвари давлат Эмомалӣ Раҳмон, ки аз дӯстдорони воқеӣ ва тарғибгарони басо фаъоли варзиш ва тарзи ҳаёти солим дар кишвар аст, натанҳо ба футболбозони тоҷик, балки ба кулли мардуми дар ин майдон ҷамъомада рӯҳу илҳоми тоза бахшид.

Хотиррасон бояд намуд, ки ин бозии якуми даври дуюми интихобӣ барои дарёфти роҳхат ба чемпионати ҷаҳон оид ба футбол дар соли 2018 миёни дастаҳои мунтахаби Тоҷикистон ва Урдун мебошад.

Бозӣ басо ҷолибу шавқовар ва бо шиддат ҷараён гирифт. Ҳарду даста ҳам барои ба даст овардани пирӯзӣ иродаи қавӣ ва маҳорату малакаи баланд нишон доданд.

Вале, тавре маълум аст, ғалаба танҳо ба як ҷониб насиб мегардад ва имрӯз бахти футболзони Урдун баландӣ кард ва онҳо бо нишон додани маҳорати баланду иродаи мустаҳкам бар соҳибони майдон бо ҳисоби 1-3 ғолиб омаданд.