Бо иштироки Президенти Ҷумҳурии Тоҷикистон Эмомалӣ Раҳмон дар варзишгоҳи марказии шаҳри Душанбе вохӯрии ҷавобии тимҳои мунтахаби миллии Тоҷикистон ва Сингапур барои дарёфти роҳхат ба марҳилаи саввуми мусобиқаи "Ҷоми ҷаҳон - 2010" баргузор гашт.

Иштироки Сарвари давлати Тоҷикистон Эмомалӣ Раҳмон дар чорабинии мазкур далели таваҷҷӯҳи доимии роҳбарияти давлату ҳукумати Ҷумҳурии Тоҷикистон ба соҳаи варзишу солимии ҷомеа ва дар ҳамин замина тарғиби варзиш дар миёни ҷавонон ҳамчун омили муҳимми таҳкимбахшандаи дӯстиву рафоқати давлатҳо ба ҳисоб меравад.

Дар варзишгоҳи марказии пойтахти ҷумҳурӣ наздики 30 ҳазор нафар мухлисони футбол аз гӯшаву канори ҷумҳурӣ ҷамъ омада буданд.

Бозии дастаҳо хеле ҷолибу шавқовар ҷараён гирифта, ба ҳисоби мусовӣ анҷом ёфт.