Дар маркази шаҳри Кӯлоб бо иштироки Президенти кишвар Эмомалӣ Раҳмон бинои сеошёнаи мақомоти маҳаллии 5 бахши соҳаи ҳифзи иҷтимоии аҳолӣ мавриди истифода қарор гирифт, ки бо харҷи беш аз 6 миллион сомонӣ бунёд ёфтааст.
Ин бино бо супориши бевоситаи Сарвари давлат Эмомалӣ Раҳмон бунёд ёфта, ба фаъолияти якҷоя ва босамари ҳамаи бахшҳои соҳаи ҳифзи иҷтимоии аҳолӣ нигаронда шудааст. Кунун имкон фароҳам омадааст, ки ҳамаи ин хадамоти хизматрасонии давлатӣ ба табақаҳои иҷтимоии аҳолӣ, аз ҷумла нафақагирону маъюбон дар як ҷо бо механзими равзанаи ягона фаъолият кунанд. Чунин тарзи кор ҳам ба ходимони ин идораҳо ва ҳам ба ниёзмандон басо қулай аст.
Ин бино аз 80 утоқи корӣ иборат буда, дар он барои беш аз 100 нафар шароити корӣ муҳайё гардидааст.
Дар ин бино ҳамчунин филиали маҳаллии Маркази ҷумҳуриявии таълими калонсолон ҷойгир шудааст, ки дар як вақт то 100 нафар бо ҳунаромӯзӣ ва бозомӯзӣ фаро мегирад.
Дар ин марказ 29 намуди касбу ҳунар ба хоҳишмандон омӯзонда мешавад. Қисмати зиёди он ҳунарҳои коргарии соҳаи сохтмон мебошад. Ҳамчунин гурӯҳҳои дӯзандагӣ, компютер, забономӯзӣ, рӯзгордорӣ, пешхизматҳои меҳмонхонаю тарабхона, ошпазӣ ва таъмиргарони мошинҳои сабукрав мавҷуд аст.