Имрӯз Президенти кишвар Эмомалӣ Раҳмон Сафири фавқулодда ва мухтори Ҷумҳурии Исломии Эрон Алиасғар Шеърдӯстро бинобар анҷом ёфтани муҳлати сафириаш дар Тоҷикистон ба ҳузур пазируфт.
Сарвари давлат Эмомалӣ Раҳмон ба саҳми намоёни Алиасғар Шеърдӯст дар таҳким ва густариши робитаҳои Тоҷикистону Эрон дар муҳлати сафирии ӯ баҳои баланд дод.
Зимни суҳбат доир ба ҳолати кунунӣ ва дурнамои муносиботи гуногунпаҳлӯи ду кишвар гуфтугӯй сурат гирифт.
Алиасғар Шеърдӯст бо ишора ба дилбастагии худ ба Тоҷикистон ва мардуми меҳмоннавози он изҳор дошт, ки минбаъд низ барои рушди муносиботи дӯстӣ ва ҳамкории судбахши ду кишвар саҳмгузор хоҳад буд.