Имрӯз Президенти Ҷумҳурии Тоҷикистон Эмомалӣ Раҳмон бо як зумра масъулон аз Ҳукумати кишвар, Дастгоҳи иҷроияи Сарвари давлат ва роҳбарони вазорату идораҳои дахлдор машварати корӣ доир намуд.

Дар машварат масоили созандагию бунёдкорӣ, ободонию кабудизоркунии муҳити зист ва дастгирии табақаҳои ниёзманди аҳолӣ баррасӣ шуд.

Сарвари давлат Эмомалӣ Раҳмон гузориши шахсони масъулро доир ба мавзӯъҳои машварат шунида, дар назди роҳбарони сохторҳои масъул барои тозаю озода нигоҳ доштани муҳити зист, шинондани ниҳолҳои сояафкану ороишӣ, бунёди боғу токзори нав, барқарорсозии боғоти кӯҳна, вусъат додани корҳои созандагӣ ва муҳайёсозии ҷойҳои иловагии корӣ вазифаҳои мушаххас гузошт.

Аз роҳбарони тамоми сохторҳои давлатию ҷамъиятӣ новобаста аз шакли моликият, соҳибкорон ва дигар шахсиятҳои саховатпеша даъват карда шуд, ки ба манзури риоят аз анъанаҳои таҷлили ҷашну идҳои пурифтихор дар арафа ва рӯзҳои Наврӯзи хуҷастапай – иди байналмилалии Наврӯз ба ятимону бепарасторон, пирону барҷомондагон, маъюбон, оилаҳои камбизоат ва дигар ниёзмандон дасти кумак дароз намоянд.