Президенти Ҷумҳурии Тоҷикистон Эмомалӣ Раҳмон ба Маҷлиси намояндагони Маҷлиси Олии Ҷумҳурии Тоҷикистон дар бораи аз вазифаҳо бозхондани раис, муовини раис ва аъзои Комиссияи марказии интихобот ва раъйпурсии Ҷумҳурии Тоҷикистон ва таъини кадрҳои дигар ба ин вазифаҳо пешниҳод ирсол намуд.
Президенти мамлакат Эмомалӣ Раҳмон мутобиқи моддаи 69 Конститутсия (Сарқонуни) Ҷумҳурии Тоҷикистон ва моддаи 11 Қонуни Конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» пешниҳод намудааст, ки Мирзоалӣ Болтуев бо сабаби ба нафақа баромадан, Муовини раиси комиссия Мизроб Кабиров ва ду нафар аъзои он Низомиддин Зоҳидов ва Саймурод Тағоев бо сабаби ба кори дигар гузаштан аз ин вазифаҳо озод карда шаванд. Ваколати узви дигари комиссияи мазкур Бобоҷон Лақаев бошад бо сабаби вафоташ боздошта мешавад.
Тибқи пешниҳоди дигари Президенти Ҷумҳурии Тоҷикистон Эмомалӣ Раҳмон, ки ба Маҷлиси намояндагони Маҷлиси Олии Ҷумҳурии Тоҷикистон ирсол гашт, Шермуҳаммад Шоҳиён ба вазифаи раиси Комиссияи марказии интихобот ва раъйпурсии Ҷумҳурии Тоҷикистон пешниҳод гардид.
Ба вазифаи муовини раиси Комиссияи марказии интихобот ва раъйпурсии Ҷумҳурии Тоҷикистон Кароматулло Холиқов - декани факултети ҳуқуқшиносии Донишгоҳи Миллии Тоҷикистон ва ба мақоми аъзои Комиссияи марказии интихобот ва раъйпурсии Ҷумҳурии Тоҷикистон Саидбой Зокиров – Раиси Иттифоқҳои касабаи вилояти Суғд, Раҳмон Зиё – Муовини директори маркази ҷумҳуриявии ташаккули тарзи ҳаёти солими Вазорати тандурустии Ҷумҳурии Тоҷикистон ва Нуралӣ Саидов – Котиби ҳамоҳангсози Шўрои ҷамъиятии Ҷумҳурии Тоҷикистон пешниҳод гардиданд.