Президенти Ҷумҳурии Тоҷикистон Эмомалӣ Раҳмон Роҳбари ҳайати Хазинаи байналмилалии асъор Дэвид Оуэенро ба ҳузур пазируфт.

Дар мулоқот масоили ҳамкории Тоҷикистон бо ин муассисаи бонуфузи молиявии ҷаҳонӣ баррасӣ шуд.

Дэвид Оуэен ба Сарвари давлат Эмомалӣ Раҳмон оид ба татбиқи барномаи ҳамкории Хазинаи байналмилалии асъор бо Бонки Миллии Тоҷикистон ахбор дода, аз рафти он изҳори қаноатмандӣ намуд. Таъкид гардид, ки барномаи мазкур айни ҳол хеле хуб оғоз ёфтааст ва метавонад ба болоравии эътибору нуфузи сохторҳои молиявии Тоҷикистон дар доираҳои байналмилалӣ мусоидати фаъол намояд.

Ба гуфти Дэвид Оуэен натиҷаҳои ниҳоии барномаи ҳамкорӣ бо Бонки Миллии Тоҷикистон моҳи ноябри соли равон ҷамъбаст ва ба Шӯрои директорони Хазинаи байналмилалии асъор пешниҳод мегардад.

Ҷонибҳо оид ба нишондодҳои макроиқтисодии Тоҷикистон, раванди ислоҳот дар иқтисодиёт ва сиёсати пулию қарзӣ, татбиқи барномаи паст кардани сатҳи камбизоатӣ ва ғайра гуфтугӯйи судманд анҷом доданд.

Изҳори боварӣ карда шуд, ки сиёсати имрӯзаи пулию қарзӣ ва тадбирҳои пешгирӣ аз болоравии сатҳи таваррум, ки аз ҷониби Ҳукумати Ҷумҳурии Тоҷикистон амалӣ мегарданд, дар шароити кунунии баландшавии нархи озуқаворӣ ва маводи сӯхт дар бозори ҷаҳонӣ метавонанд бозор ва дар маҷмӯъ иқтисодиёти кишварро аз таъсири манфии омилҳои берунӣ ҳифз намоянд.

Зимни сӯҳбати озоду созанда ҳарду ҷониб омодагӣ ва ҳавасмандии худро баҳри идомаи ҳамкории пурсамар таъкид намуданд.