Президенти Ҷумҳурии Тоҷикистон Эмомалӣ Раҳмон аз Сафири нави фавқулодда ва мухтори Мексика дар Тоҷикистон Артуро Эрнандес эътимоднома қабул намуд.
Дар сӯҳбати онҳо, ки баъди супурдани эътимоднома сурат гирифт, масоили ҳамкории ду кишвар баррасӣ шуд.
Таъкид гардид, ки муносибатҳои Тоҷикистону Мексика бештар дар доираи Созмони Милали Муттаҳид ва дигар созмонҳои байналмилалӣ дар шакли мубодилоти сиёсӣ сурат мегиранд.
Аз ҷумла зикр карда шуд, ки Тоҷикистону Мексика аз ташаббускорони фаъоли ҳаллу фасли масоили вобаста ба об дар ҷаҳон мебошанд.
Ҷонибҳо ба қарор омаданд, ки муносибатҳои дуҷониба низ ба роҳ монанд. Ҳамкорӣ дар соҳаҳои гидроэнергетика ва саноати сабук, кимиё ва кӯҳӣ аз самтҳои фоидаовар барои ҳарду кишвар маънидод гардид.
Артуро Эрнандес таъкид дошт, ки таҷрибаи Тоҷикистон дар бунёди нерӯгоҳҳои обӣ барои Мексика бисёр ҷолиб аст.
Сарвари давлат Эмомалӣ Раҳмон изҳор намуд, ки Тоҷикистон барои густариш додани муносибатҳои дуҷониба омодааст, ба сафорати дар Амрико доштаи худ ваколати кор бо Мексикаро низ диҳад.