Имрўз Президенти Ҷумҳурии Тоҷикистон Эмомалӣ Раҳмон Роҳбари Хадамоти федеролии назорати маводи нашаовари Федератсияи Русия Виктор Ивановро ба ҳузур пазируфт.

Дар мулоқот масоили ҳамкории Тоҷикистону Русия дар мубориза бо истеҳсол ва гардиши ғайриқонунии маводи мухаддир баррасӣ шуд.

ҳамкории сохторҳои ҳифзи ҳуқуқи Тоҷикистону Русия дар ин самти муҳим «намунавӣ» арзёбӣ шуд.

Таъкид гардид, ки ҳарду ҷониб аз афзоиши истеҳсол ва қочоқи маводи мухаддир аз ҳудуди Афғонистон нигаронӣ доранд ва омодаанд, ки баҳри пешгирӣ аз ин хатар тадбирҳои муштаракро тақвият бахшанд.

Виктор Иванов ҳамчунин ба тадбирҳои Тоҷикистон, ки бо кишварҳои пешрафтаи ғарб дар ин самт анҷом медиҳад, аз ҷумла кушодани Коллеҷи марзбонии Созмони амният ва ҳамкорӣ дар Аврупо дар шаҳри Душанбе, баҳои баланд дода, чунин сиёсати кишвари моро «намунаи ҳамкории байналмилалӣ» маънидод кард.

Дар мулоқот ҳамчунин оид ба дигар масоили мавриди таваҷҷўҳ гуфтугў сурат гирифт.