Имрўз Президенти Ҷумҳурии Тоҷикистон Эмомалӣ Раҳмон Дабири кулли Созмони Аҳдномаи амнияти дастаҷамъӣ Николай Бордюжаро ба ҳузур пазируфт.
Дар мулоқот асосан масоили вобаста ба вазъи кунунии қирғизистон ва омодагӣ ба ҳамоиши ғайрирасмии сарони давлатҳои аъзои Созмони Аҳдномаи амнияти дастаҷамъӣ, ки моҳи август дар шаҳри Ереван баргузор хоҳад гашт, баррасӣ шуд.
Зимни мулоқот Сарвари давлати Тоҷикистон Эмомалӣ Раҳмон ба қарори Шўрои амнияти дастаҷамъии Созмони Аҳдномаи амнияти дастаҷамъӣ оид ба расондани кўмаки фаврӣ ба ҷумҳурии қирғизистон имзо гузошт. Мутобиқи ин санад кишварҳои аъзои Созмони Аҳдномаи амнияти дастаҷамъӣ ба сохторҳои қудратӣ ва ҳифзи ҳуқуқи қирғизистон барои нигоҳдорӣ ва таҳкими амнияту субот дар ҷануби ин кишвар кўмаки моддию техникӣ мерасонанд.
Дар мулоқот ҳамчунин оид ба авзои кунунии Афғонистон, таъсири он ба вазъи минтақа, мубориза бо қочоқи маводи мухаддир ва доир ба дигар масоили мавриди таваҷҷўҳ гуфтугў сурат гирифт.