Президенти Ҷумҳурии Тоҷикистон Эмомалӣ Раҳмон Роҳбари нави Бахши Хазинаи байналмилалии асъор доир ба Тоҷикистон Тодди Шнайдерро ба ҳузур пазируфт.

Дар мулоқот масоили татбиқи амалии барномаи ҳамкории Тоҷикистон бо ин муассисаи ҷаҳонии молиявӣ дар нимсолаи якуми соли равон, нақшаҳо барои нимсолаи дуюми имсол ва соли 2011 баррасӣ шуд.

Аз афзоиши ҳаҷми маҷмўи маҳсулоти дохилии Тоҷикистон, ки бо вуҷуди идомаи таъсири манфии бўҳрони ҷаҳонии молиявию иқтисодӣ ва дигар омилҳои номатлуби берунӣ дар 8 моҳи соли равон 6,1% - ро ташкил додааст ва дар сатҳи 4,8% нигоҳ дошта шудани таваррум изҳори қаноатмандӣ карда шуд.

Ба гуфти Тодди Шнайдер, «нишондодҳои макроиқтисодии имсолаи Тоҷикистон аз он гувоҳӣ медиҳанд, ки ин кишвар тадриҷан аз бўҳрони ҷаҳонии молиявию иқтисодӣ берун шуда истодааст».

Ҳарду ҷониб омодагии худро баҳри таҳким ва густариши минбаъдаи ҳамкории судбахш таъкид намуданд.