Президенти Ҷумҳурии Тоҷикистон Эмомалӣ Раҳмон Вазири Давлати Қатар доир ба масоили байналмилалӣ Холид ал-Атийяро ба ҳузур пазируфт.
Дар мулоқот масоили вобаста ба татбиқи амалии санадҳои ҳамкории дуҷониба, ки дар шаҳри Душанбе ва шаҳри Давҳа– пойтахти Қатар дар ҳузури сарони ду давлат ба имзо расида буданд, баррасӣ шуд.
Чунонки Сарвари давлат Эмомалӣ Раҳмон изҳор дошт, «Қатар аз давлатҳое аст, ки ба масоили сармоягузорӣ дар Тоҷикистон ва густариши ҳамкории иқтисодӣ бо кишвари мо таваҷҷўҳи зиёд зоҳир намудааст. Аз ин хотир мо ба муносибатҳои дўстию ҳамкориҳои мутақобилан судманди дуҷониба назари наку дорем».
Таваҷҷўҳи асосӣ ба масоили лоиҳакашӣ ва бунёди Масҷиди ҷомеъи Душанбе, ки калонтарин дар қаламрави собиқ Иттиҳоди Шўравӣ хоҳад буд ва шаҳраки муосири Диёри Душанбе дар пойтахти кишвари мо зоҳир карда шуд.
Дар Масҷиди ҷомеи Душанбе, бо назардошти пешниҳодоти иловагии Сарвари давлат, барои 105 ҳазор нафар намозгузорон ҷой мешавад, 25 ҳазор дар дохили бинои масҷид ва 80 ҳазор дар саҳни ҳавлӣ ва атрофи он. Шаҳраки муосири Диёри Душанбе бошад, иборат аз биноҳои бисёрқабатаи истиқоматӣ, меҳмонхонаҳои замонавӣ, марказҳои савдо ва мавзеъҳои фароѓат ва сайру гашти оммавӣ хоҳад буд.
Интизор меравад, ки барои татбиқи ин ва дигар лоиҳаҳо дар дурнамои миёнамўҳлати ҳамкорӣ аз ҷониби Давлати Қатар дар Тоҷикистон беш аз 500 миллион доллари амрикоӣ сармоягузорӣ карда шавад.
Зимни сўҳбати пурмўҳтаво тезондани татбиқи лоиҳаҳои муштараки Тоҷикистону қатар зарур шумурда шуд.