Президенти Ҷумҳурии Тоҷикистон Эмомалӣ Раҳмон аз ҳодисаи фоҷеабори ҳуҷуми мусаллаҳона ба автомошинаи сарбозони Артиши миллӣ, ки нимаи рўзи 19 – уми сентябр дар ноҳияи Рашт рух додааст, андўҳгин буда, ба волидону наздикони нафарони дар ин воқеа ҳалокшуда, изҳори тасаллияту ҳамдардӣ намуд.

Сарвари давлат Эмомалӣ Раҳмон, ки баҳри иштирок дар Иҷлосияи 65 – уми Маҷмаъи умумии Созмони Милали Муттаҳид вориди шаҳри Ню-Йорки Иёлоти Муттаҳидаи Амрико шудааст, ба Вазорати дифоъ, Вазорати корҳои дохилӣ ва Кумитаи давлатии амнияти миллӣ супоришҳои қатъӣ дод, ки тибқи он гурўҳи ҷиноятпешаи ба ин кори нангин дастзада бояд дастгир карда шуда, ба ҷавобгарӣ кашида шавад.

Тибқи супоришҳои Сарвари давлат айни ҳол ниҳодҳои қудратии мамлакат баҳри таъмини амнияту субот ва зиндагии осоиштаи мардум чораҳои муассир амалӣ менамоянд.