Президенти Ҷумҳурии Тоҷикистон Эмомалӣ Раҳмон ба Президенти Федератсияи Русия Дмитрий Медведев барои марги бармаҳалли корманди намоёни давлатии ин кишвар Виктор Черномирдин барқияи тасаллият ирсол намуд.
Сарвари давлати Тоҷикистон Эмомалӣ Раҳмон аз хизматҳои шоёни Виктор Черномирдин дар дохил ва хориҷи кишвараш ҳангоми адои вазифаҳои гуногуни давлатӣ, аз ҷумла Раиси Ҳукумати Федератсияи Русия дар солҳои вазнини 90 – уми асри гузашта ёдовар шуда, ба нақши ў дар ташкили давлати навини демократии Русия ва иқтисоди бозории он баҳои баланд додааст.
Президенти Ҷумҳурии Тоҷикистон Эмомалӣ Раҳмон нақши Виктор Черномирдинро дар арсаи минтақа ва ҷаҳон низ намоён арзёбӣ карда, доир ба саҳми ў дар густариши муносибот бо Тоҷикистони соҳибистиқлол изҳор дошт: - «Дар кишвари мо саҳми бузурги Виктор Степановичро дар таҳкими ҳамшарикии стратегии Тоҷикистону Русия ҳамеша дар ёд доранд. Мо доимо, хусусан дар солҳои вазнин, кўмаку дастгирии беғаразонаи ўро эҳсос мекардем».
Сарвари давлати Тоҷикистон Эмомалӣ Раҳмон аз Президенти Федератсияи Русия Дмитрий Медведев хоҳиш намудааст, ки ҳамдардии самими ўро ба аҳли хонавода ва наздикони шодравон бирасонад.