Президенти Ҷумҳурии Тоҷикистон Эмомалӣ Раҳмон дар қисмати ифтитоҳии ҳамоиши сарони ҳукуматҳои кишварҳои аъзои Созмони Ҳамкории Шанхай, ки дар бўстонсароии шаҳрии Ҳукумати Ҷумҳурии Тоҷикистон ба кори худ шурўъ кард, иштирок ва суханронӣ намуд.

Хотиррасон бояд намуд, ки барои иштирок дар ин ҳамоиш Раиси ҳукумати Федератсияи Русия Владимир Путин, Сарвазири Шўрои давлатии Ҷумҳурии Мардумии Чин Вен ҷибао, Президенти Ҷумҳурии Қирғизистон Роза Отунбоева, Сарвазири Ҷумҳурии Қазоқистон Карим Масимов, Муовини сарвазири Ҷумҳурии Узбекистон Ботир Хоҷаев, муовини аввали Президенти Ҷумҳурии Исломии Эрон Муҳаммадризо Раҳимӣ, Сарвазири Покистон Юсуф Ризо Гелонӣ, Вазири энергетикаи Ҷумҳурии Ҳиндустон Сушил Кумар Шинде, Вазири корҳои хориҷии Муғулистон Гомбожавл Зандамшатарм, Вазири иқтисоди Ҷумҳурии Исломии Афғонистон Абдулҳодӣ Арғандивол ташриф овардаанд.

Сарвари давлат Эмомалӣ Раҳмон нахуст сарони ҳукуматҳои кишварҳои аъзои Созмони ҳамкории Шанхай, кишварҳои нозир ва даъватшудагонро ба Тоҷикистон хайра мақдам гуфта, ба онҳо кори пурсамар ва будубоши гуворо таманно намуд.

Президенти мамлакат Эмомалӣ Раҳмон изҳор дошт, ки қарорҳои дар ин ҳамоиш қабулшаванда барои таҳкими минбаъдаи обурўю нуфузи Созмони ҳамкории Шанхай дар минтақа ва ҷаҳон нақши муҳим хоҳанд гузошт.

Сарвари давлати Тоҷикистон Эмомалӣ Раҳмон оид ба рушду густариши ҳамкорӣ дар чаҳорчўби ин созмони бонуфузи минтақавӣ андешаронӣ карда, аз ҷумла оид ба тавсиаи ҳамгироӣ дар самтҳои амният, иқтисод ва тиҷорат, сармоягузорӣ, муносиботи бонкӣ, энергетика, нақлиёту коммуникатсия, туризм ва ғайра пешниҳодҳои муфид ба миён гузошт.

«Тоҷикистон ҳамеша баҳри таҳкими ҳамгироӣ дар чаҳорчўби Созмони ҳамкории Шанхай дар асоси эҳтироми ҳамдигарӣ, баробарӣ ва эътибор ба манофеи ҳамдигар саҳми намоёни худро мегузорад».