22 декабр ба унвони Президенти Ҷумҳурии Тоҷикистон Эмомалӣ Раҳмон аз Хазинаи байналмилалии асъор хабар расид, ки рӯзи 21 декабри соли 2005 дар ҷаласаи Шӯрои директорони ин институти бонуфузи молиявии ҷаҳонӣ дар бораи бахшидани қарзи давлатии Тоҷикистон ба андозаи 99 млн. доллари амрикоӣ қарор қабул гардид.

Дар нома зикр шудаааст, ки қарзи Тоҷикистон ба хотири рушди макроиқтисодии ҷумҳурӣ, сиёсати дурусти Ҳукумати Ҷумҳурии Тоҷикистон дар роҳи демократикунонии ҷомеа, паст кардани сатҳи камбизоатии аҳолӣ ва ба талаботи ҳуқуқии стандарти байналмилалӣ мувофиқ гаштани қонунгузории Ҷумҳурии Тоҷикистон бекор карда мешавад.

Президенти Ҷумҳурии Тоҷикистон Эмомалӣ Раҳмон имрӯз дар охири машварати умумиҷумҳуриявӣ оид ба вазъияти соҳаи маориф ин хушхабари рӯҳафзоро қироат намуда, изҳор дошт, ки акнун аз ҳисоби маблағҳои барои пардохти қарзи берунаи Ҳукумати Ҷумҳурии Тоҷикистон дар соли оянда пешбинишуда мо метавонем ба соҳаи маорифи ҷумҳурӣ боз маблағҳои иловагӣ ҷудо намоем.

Ин хушхабар аз ҷониби аҳли толор бо хушнудӣ ва шукргузорӣ аз сиёсати хирадмандона ва дурбинонаи Президенти Ҷумҳурии Тоҷикистон Эмомалӣ Раҳмон пазируфта шуд.