12 декабр Президенти Ҷумҳурии Тоҷикистон Эмомалӣ Раҳмон аз Сафири нави Фавқулодда ва Мухтори Ҷумҳурии Маҷористон дар Тоҷикистон Янош Немет эътимоднома қабул намуд.
Дар мулоқоти Президенти Ҷумҳурии Тоҷикистон Эмомалӣ Раҳмон бо сафири Маҷористон, ки баъди анҷоми маросими қабули эътимоднома сурат гирифт, масоили ҷорӣ ва дурнамои ҳамкориҳои Тоҷикистону Маҷористон мавриди баррасӣ қарор гирифтанд.
"Мо ба рушди ҳамкориҳои мутақобилан судманд бо кишварҳои Аврупои Шарқӣ, аз ҷумла, бо Маҷористон диққати ҷиддӣ медиҳем, - баён дошт дар оғози сӯҳбат Президенти Ҷумҳурии Тоҷикистон Эмомалӣ Раҳмон ва изҳори умедворӣ намуд, ки кишварҳои мо метавонанд имкониятҳои мавҷударо бо самараи бештар истифода бурда, муносибатҳои дуҷонибаро ба сатҳи болотар бароранд".
Дар ҷавоб Сафири нави Фавқулодда ва Мухтори Ҷумҳурии Маҷористон дар Тоҷикистон Янош Немет изҳор дошт, ки "мо кишвари Шуморо шарики муҳимми худ ҳам дар муносибатҳои дуҷониба ва ҳам дар доираи эътилофи байналмилалии зидди террористӣ мешуморем".
Ҷонибҳо атрофи имкониятҳои мавҷудаи ҳамкорӣ дар доираи муносибатҳои дуҷониба ва ҳам дар чаҳорчӯбаи созмонҳои байналмилалию минтақавӣ, дар соҳаи сиёсат, иқтисод ва савдо, энергетика соҳибкории хусусӣ, туризм, мубодилаи иттилооту технология ва дигар масоили мавриди таваҷҷӯҳи ҳарду ҷониб мубодилаи афкор намуданд.