23 ноябр Дастгоҳи иҷроияи Президенти Ҷумҳурии Тоҷикистон мутобиқи Амри Президенти Ҷумҳурии Тоҷикистон аз 22 ноябри соли равон аз ҳисоби компютерҳои мувофиқи фармоиши Ҳукумати Ҷумҳурии Тоҷикистон аз 14 апрели соли 2005 харидоришуда барои муҷаҳҳаз намудани синфҳои компютерии мактабҳои таҳсилоти умумӣ ба мақомоти иҷроияи маҳаллии ҳокимияти давлатии ноҳияҳои тобеи ҷумҳурӣ 440 адад компютер ва 74 принтер ҷудо намуд.

Ҳадафи асосии ин тадбир дар амал татбиқ намудани дастуру супоришҳои Сарвари давлат Эмомалӣ Раҳмон ва Барномаҳои рушди соҳаи маориф аст, ки ба беҳтар намудани таъминоти мактабҳои таҳсилоти умумӣ бо маводи техникӣ ва асбобҳои аёнии таълимӣ нигаронида шудаанд.

Ба сатҳи зарурӣ ва мувофиқи талаби замон баровардани сифати таълими асосҳои компютер, забонҳои хориҷӣ, фанҳои дақиқ ва дигар фанҳо дар муассисаҳои таълимӣ аз самтҳои афзалиятноки сиёсати дохилии Ҳукумати Ҷумҳурии Тоҷикистон ва талаботи қотеонаи Президенти Ҷумҳурии Тоҷикистон Эмомалӣ Раҳмон аст.