3 сентябр Президенти Ҷумҳурии Тоҷикистон Эмомалӣ Раҳмон дар арафаи ҷашни 14-умин солгарди Истиқлолияти давлатии Ҷумҳурии Тоҷикистон ба гурӯҳи калони намояндагони соҳаҳои мухталифи хоҷагии халқи мамлакат, ки нишондиҳандаҳои назарраси истеҳсолию эҷодӣ ва пешравиҳои беҳтарини касбӣ доранд, мукофотҳои давлатӣ супорид.
"Истиқлолият неъмати бебаҳо ва дастоварди бузургтарини халқи тоҷик буда, эҳсоси худшиносию худогоҳӣ ва ифтихормандии тоҷикистониёнро дар мавриди ҳифзу гиромидошти арзишҳои беназири миллӣ қавитар гардонид", - гуфт Президенти Ҷумҳурии Тоҷикистон Эмомалӣ Раҳмон қабл аз тақдими мукофотҳои давлатӣ. Сарвари давлат ҳозиринро бо фарорасии 14-умин солгарди Истиқлолияти давлатии Ҷумҳурии Тоҷикистон ва сарфарозӣ ба мукофотҳои давлатӣ самимона шодбош гуфта, ба онҳо пешравию комёбиҳои нав таманно кард.
Як қатор фаъолони ҷомеа барои хизматҳои махсус дар рушди адабиёту санъат, фарҳангу маориф, ҷасорату фидокорӣ ҳангоми иҷрои қарзи ҳарбӣ, таҳкими қонуният ва тартиботи ҳуқуқӣ, иштироки фаъолона дар ҳаёти давлатию ҷамъиятӣ ва тарбияи кадрҳои баландихтисос бо ордени "Спитамен" дараҷаи I, ордени "Шараф" дараҷаҳои I ва II, медали "Ҷасорат", медали "Хизмати шоиста", медали "Шафқат" ва медали "Марзбони шуҷоъи Тоҷикистон" мушарраф шуданд.
Сарвари давлат дар вазъияти тантанавӣ ба балетмейстер - таҳиягари Театри давлатии академии опера ва балети ба номи Садриддин Айнӣ Сталина Азаматова, актёри Театри намунавии миниётураи "Ойина"-и Идораи фарҳанги шаҳри Душанбе Асланшоҳ Раҳматуллоев унвони фахрии "Ҳунарпешаи халқии Тоҷикистон" ва ба балетмейстери Ансамбли тарона ва рақси "Навои Хатлон"-и назди Қасри фарҳанги шаҳри Кӯлоб Зуҳро Назарова унвони фахрии "Ҳунарпешаи шоистаи Тоҷикистон"-ро сазовор донист.
Дар хатми ҷаласаи тантанавӣ Президенти Ҷумҳурии Тоҷикистон Эмомалӣ Раҳмон бори дигар ҳозиринро бо мукофотҳои давлатӣ ва фарорасии иди Истиқлолияти давлатӣ шодбош гуфт.