26 июл Президенти Ҷумҳурии Тоҷикистон Эмомалӣ Раҳмон вазири дифои ИМА Доналд Рамсфелдро ба ҳузур пазируфт.
Дар ҷараёни сӯҳбат маҷмӯи васеи масъалаҳои ҳамкориҳои дуҷониба дар бахшҳои сиёсӣ, иқтисодӣ ва ҳарбию техникӣ баррасӣ шуданд.
"Дар муносиботи Тоҷикистону Амрико марҳила ба марҳила натиҷаҳои пурсамару эътимодбахш ба мушоҳида мерасад", - изҳори қаноатмандӣ карда шуд дар мулоқот. Ба андешаи мусоҳибон оғози сохтмони купрӯки дӯстӣ миёни Ҷумҳурии Тоҷикистон ва Ҷумҳурии Исломии Афғонистон, ки аз ҷониби ИМА маблағгузорӣ мешавад, омили муҳимми вусъатбахши раванди барқарорсозии Афғонистон буда, ба ривоҷи ҳамкориҳои минтақавӣ заминаи устувор хоҳад гузошт.
Президенти Ҷумҳурии Тоҷикистон Эмомалӣ Раҳмон ба Ҳукумати ИМА барои сармоягузории бунёди купрук ва як қатор лоиҳаҳои муштарак, инчунин ҳамкориҳо дар бахши таҳкими нерӯҳои сарҳадӣ, мубориза алайҳи гардиши ғайриқонунии маводи мухаддир ва тайёр кардани мутахассисон арзи сипос кард.
Вазири дифои ИМА Доналд Рамсфелд низ ба Президенти Ҷумҳурии Тоҷикистон Эмомалӣ Раҳмон ҷиҳати мусоидати ҳамаҷониба дар мавриди фаъолияти эътилофи байналмилалии мубориза алайҳи терроризм, таъмини суботу амнияти минтақа ва ҷаҳон изҳори сипос кард.
Дар мулоқот доир ба мавзӯъҳои дорои характери минтақавию байналмилалӣ табодули назари судманд ҷараён гирифт.