21 июн Президенти Ҷумҳурии Тоҷикистон Эмомалӣ Раҳмон Директори минтақавии Бонки ҷаҳонӣ Деннис Де Трейро ба ҳузур пазируфт.

Дар мулоқот оид ба маҷмӯи васеи масъалаҳои ҳамкории Ҷумҳурии Тоҷикистон бо Бонки ҷаҳонӣ табодули назар карда шуд.

Ҷонибҳо бо изҳори қаноатмандӣ таъкид намуданд, ки Стратегияи нави кӯмак ба Ҷумҳурии Тоҷикистон барои солҳои 2006-2009 ҳамчун ҳуҷҷати муштарак қадами муҳимме дар таҳкими ислоҳоти бобарори иқтисодӣ ва ҳалли мушкилоти иҷтимоӣ хоҳад буд.

Тавре дар сӯҳбат зикр гардид, татбиқи амалии лоиҳаҳои инвеститсионии Ҷумҳурии Тоҷикистон дар мавриди азхудкунии захираҳои обӣ ва канданиҳои фоиданоки табиӣ имконияти азиме дар самти таъмини мустақилияти комили энергетикии мамлакат ва фурӯши нерӯи барқ ба хориҷи кишвар мебошад. "Бо ҷалби сармояи Федератсияи Россия, Ҷумҳурии Исломии Эрон, Ҷумҳурии Исломии Покистон, Чехия ва дигар мамолики манфиатдор, ҳамзамон бо таъсиси Консорсиуми байналмилалӣ вусъат бахшидани сохтмони нерӯгоҳҳои "Сангтӯда-1", "Сангтӯда-2" ва "Роғун" ба манфиати рушди ҳамкориҳои минтақавӣ аст",- таъкид ёфт дар вохӯрӣ.

Деннис Де Трей ба талошҳои Президенти Ҷумҳурии Тоҷикистон Эмомалӣ Раҳмон дар роҳи инкишофи минтақавӣ ва дар ҳамин замина бо ибтикори Ҳукумати Ҷумҳурии Тоҷикистон  ташкил ва гузаронидани тадбирҳои муҳимми байналмилалии молиявию иқтисодӣ баҳои баланд дод.