10 июн Президенти Ҷумҳурии Тоҷикистон Эмомалӣ Раҳмон нахустин Сафири Фавқулодда ва Мухтори Ҷумҳурии Куба дар Ҷумҳурии Тоҷикистон Тересито Капото Камачоро ба ҳузур пазируфт.

Дар мулоқот маҷмӯи васеи масъалаҳои ҳамкории дуҷониба, дар самтҳои иқтисодию тиҷоратӣ ва илмию техникӣ баррасӣ шуданд.

- "Ҷумҳурии Тоҷикистон сиёсати дарҳои кушодаро пеш гирифта, ба рушди муносибатҳои ба тарафҳо манфиатнок омода аст", - гуфт Президенти Ҷумҳурии Тоҷикистон Эмомалӣ Раҳмон.

Сарвари давлати Тоҷикистон Эмомалӣ Раҳмон аз дастовардҳои назарраси ислоҳоти иқтисодию сохторӣ, натиҷаҳои бобарори ҳамкориҳои муштарак бо мамолики дуру наздики олам ва шароитҳои мусоиди ҷалби сармоя ба иқтисодиёти Ҷумҳурии Тоҷикистон  ёдовар шуда, қувват бахшидани робитаҳои дуҷонибаи Ҷумҳурии Тоҷикистон ва Ҷумҳурии Кубаро ба хусус дар мавриди азхудкунии захираҳои энергетикӣ, канданиҳои фоиданок ва металлургия талаби рӯз номид.

Дипломати Куба талошҳои Президенти Ҷумҳурии Тоҷикистон Эмомалӣ Раҳмонро бобати саҳмгирӣ дар ҳалли мушкилоти глобалии сайёра, аз истифодаи самараноки захираҳои обӣ аз қабили вусъати мубориза бар зидди терроризми байналмилалӣ ва дигар зуҳуроти вобаста ба он  назаррасу дурандешона арзёбӣ намуд ва афзуд, ки дар густариши муносиботи иқтисодию тиҷоратии миёни Ҷумҳурии Тоҷикистон ва Ҷумҳурии Куба тамоми имкониятҳои мавҷударо истифода хоҳад кард.

Дар вохӯрӣ ба як қатор масъалаҳои дорои характери минтақавию байналмилалӣ таваҷҷӯҳ зоҳир карда шуд.