16 май Президенти Ҷумҳурии Тоҷикистон Эмомалӣ Раҳмон оид ба ҷараёни омодагӣ ба мулоқоти Сарвари давлат бо намояндагони ҷавонони ҷумҳурӣ, ки рӯзи 21 майи соли равон ба нақша гирифта шудааст, машварат гузаронд.
"Ин мулоқот бояд озоду ошкоро ва фарогири масъалаҳои муҳимтарини ҳаёти ҷавонон, иштироки онҳо дар эъмори ҷомеаи ҳуқуқбунёду дунявии Тоҷикистон ва дурнамои сиёсати давлатии ҷавонони мамлакат бошад", - изҳор дошт Президенти Ҷумҳурии Тоҷикистон Эмомалӣ Раҳмон.
Роҳбарони вазорату идораҳои ҷумҳуриявӣ ва кормандони Дастгоҳи иҷроияи Президенти Ҷумҳурии Тоҷикистон доир ба раванди омодагӣ ба мулоқот, даъвати намояндагони ҷавонон аз кулли шаҳру навоҳии мамлакат ва аз соҳаҳои мухталифи ҷомеа гузориш доданд.
"Мо аз ҷавонони ғайратпешаву соҳибифтихори Ватан, ки талошу таҷриба, донишу истеъдоди худро баҳри саҳмгирӣ дар таҳкими истиқлолияти давлатии Ҷумҳурии Тоҷикистон равона кардаанд, умеду эътимоди калон дорем", - таъкид гардид дар машварат.