20 январ Президенти Ҷумҳурии Тоҷикистон Эмомалӣ Раҳмон аз Сафири Фавқулодда ва Мухтори Литва дар Ҷумҳурии Тоҷикистон  Ромуалдас Високавичюс эътимоднома қабул кард.

Президенти Ҷумҳурии Тоҷикистон баъди маросими қабули эътимоднома зимни сӯҳбати муфассалу самарабахш зикр намуд, ки бо назардошти  захираю имкониятҳои ҳамкории ҳар ду мамлакат ба бештар густариш додани муносибатҳои  мутақобилан муфиди тиҷоратию иқтисодии онҳо мусоидат кардан зарур аст. Айни ҳол барои ин ҳамаи шароиту имкониятҳои зарурӣ фароҳам гаштаанд.

Мусоҳибон қайд карданд, ки дар давоми ёздаҳ моҳи соли гузашта маблағи хариду фурӯши мол дар байни Тоҷикистон ва Литва ба бештар аз 13 миллион доллари ИМА расид. Ин нисбат ба солҳои  гузашта хеле зиёд мебошад.

Сардори давлат дар ҷараёни сӯҳбати тӯлонию муфассал изҳори умед кард, ки фаъолияти сафири нави Литва дар Тоҷикистон ба ҳарчи бештар равнақу ривоҷ додани  ҳамкории тиҷоратию иқтисодии ҳарду мамлакат сафарбар  карда хоҳад шуд.