Президенти Ҷумҳурии Тоҷикистон

Гулгузорӣ дар боғи Ғалаба

08.05.2015 09:02, шаҳри Душанбе

Имрӯз бо иштироки Президенти кишвар Эмомалӣ Раҳмон дар боғи Ғалабаи пойтахт ба муносибати солгарди 70-уми Ғалабаи бузург бар фашизми гитлерӣ маросими гулгузорӣ дар назди гулхани ёдгорӣ баргузор шуд.

Ба истиқболи 70-солагии пирӯзӣ бар фашизми гитлерӣ майдони маросимҳои Боғи Ғалабаи шаҳри Душанбе ба таври идона ороста шуда буд. Ин маросими бошукӯҳ бо иштироки Сарвари давлат Эмомалӣ Раҳмон, роҳбарият ва аъзои Парлумон ва Ҳукумати ҷумҳурӣ, корпуси дипломатии муқими Тоҷикистон, собиқадорони ҷангу ақибгоҳ ва намояндагони сершумори аҳли ҷамоати пойтахт ҷараён гирифт.

Ба Президенти Ҷумҳурии Тоҷикистон, Сарфармондеҳи олии Қувваҳои Мусаллаҳ Эмомалӣ Раҳмон вазири мудофиаи кишвар Шералӣ Мирзо аз омодагии ҷузъу томҳои гарнизони ҳарбии Душанбе ба маросими гулгузорӣ ва расми гузашти низомӣ гузориш дод.

Президенти кишвар Эмомалӣ Раҳмон зимни суханронӣ Ҷанги дуюми ҷаҳониро аз ҷумлаи “фоҷиабортарин ҷангҳо” дар таърихи инсоният номида, ҳамаи собиқадорони ҷангу меҳнат ва тамоми мардуми сулҳхоҳу ваҳдатсози кишвари маҳбубамонро, ки дар набардҳои шадиди ин ҷанг мардонавор истодагарӣ карда, барои таъмин намудани пирӯзӣ бар фашизм саҳми арзишманд гузоштаанд, самимона табрик гуфт ва ба ҳар хонадони тоҷик фазои орому осуда, хонаи обод ва тандурустиву хушбахтӣ таманно кард.

Тавре зикр гардид, беш аз 300 ҳазор фиристодагони Тоҷикистон дар набардҳои шадиди ин ҷанги пурдаҳшат шуҷоату мардонагӣ нишон дода, 92 ҳазор нафари онҳо ба хотири адо кардани қарзи фарзандии хеш ҷон супурдаанд.

Таъкид гардид, ки шуҷоату диловарии фарзандони баору номуси мо дар солҳои Ҷанги дуюми ҷаҳонӣ намунаи олии ватандӯстӣ ва сабақи беҳтарини мардонагиву ватандорӣ барои наслҳои имрӯзу оянда мебошад, бахусус дар шароити ноором ва бисёр мураккаби кунунӣ, ки таҳдиду хатарҳои ҷаҳонӣ аз қабили терроризму ифротгароӣ ва миллатгароиву нажодпарастӣ рӯз то рӯз вусъат пайдо мекунад.

Ба поси хотири қурбониёни Ҷанги дуюми ҷаҳонӣ дар назди гулхани абадӣ гулчанбарҳо гузошта шуд.

Нахуст Президенти Ҷумҳурии Тоҷикистон, Сарфармондеҳи олии Қувваҳои Мусаллаҳи кишвар Эмомалӣ Раҳмон бо гузоштани гулчанбар хотираи қаҳрамонону иштирокдорони он ҷанги пурдаҳшатро пос дошт.

Сипас гулчанбарҳо аз номи Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон, Ҳукумати Ҷумҳурии Тоҷикистон, мақомоти иҷроияи маҳаллии ҳокимияти давлатии шаҳри Душанбе, собиқадорони ҷангу меҳнат, сохторҳои қудратии Тоҷикистон, корпуси дипломатии муқими Ҷумҳурии Тоҷикистон, Сафорат ва Пойгоҳи низомии 201-уми Федератсияи Русия дар Тоҷикистон ва ҳамчунин аз номи ҷавонони Ҷумҳурии Тоҷикистон гузошта шуд.

Хотираи неки қурбониёни Ҷанги дуюми ҷаҳонӣ ҳамчунин бо дақиқаи хомӯшӣ пос дошта шуд.

Маросими гиромидошти хотираи қурбониёни ҷанг бо гузашти низомии ҷузъутомҳои гарнизони ҳарбии Душанбе идома ёфт. Дар гузашти низомӣ афсарону сарбозони ҳамаи воҳидҳои низомии кишвар, аз ҷумла Вазорати мудофиа, Вазорати корҳои дохилӣ, Қӯшунҳои сарҳадии Кумитаи давлатии амнияти миллӣ, Гвардияи миллии Тоҷикистон, Сарраёсати иҷрои ҷазои ҷиноятии Вазорати адлия, Кумитаи ҳолатҳои фавқулодда ва мудофиаи гражданӣ ва як воҳиди низомӣ аз Пойгоҳи ҳарбии 201-уми Федератсияи Русия дар Тоҷикистон ширкат намуданд.

Сарвари давлат Эмомалӣ Раҳмон, ҳамчунин бо намояндагони насли наврасу ояндасози кишвар ва собиқадорони ҷангу меҳнат аз наздик суҳбат намуда, ба пирони диловару барнодил барои ҷонбозию қаҳрамониҳои онҳо дар он ҷанги пурдаҳшат ва ҳам дар таълиму тарбияи насли навраси кишвар дар рӯҳияи ватандӯстӣ ва ҷавонмардию матонат арзи қадрдонӣ намуд.

facebook
twitter
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
Харита
© Хадамоти матбуоти Президенти Тоҷикистон, 2005 - 2018
Тел/Факс.: (+992 37)2212520