Президенти Ҷумҳурии Тоҷикистон

Маҷлиси Ҳукумати Ҷумҳурии Тоҷикистон

29.10.2011 11:00, шаҳри Душанбе

Таҳти раёсати Президенти Ҷумҳурии Тоҷикистон, Раиси ҳукумати кишвар Эмомалӣ Раҳмон маҷлиси навбатии Ҳукумати Ҷумҳурии Тоҷикистон баргузор гардид.
Дар маҷлиси Ҳукумати Ҷумҳурии Тоҷикистон нахуст масъалаи кадрҳо баррасӣ шуда, аз ҷумла ҳафт нафар ба вазифаҳои пурмасъулияти роҳбарӣ дар Вазорати маориф, Кумитаи кор бо занон ва оила, Кумитаи андоз ва Корхонаи воҳиди давлатии Тоҷиксуғурта таъин шуданд. Аз онҳо 5 нафарашон занони кордону соҳибтаҷриба мебошанд. Сарвари давлат Эмомалӣ Раҳмон таъкид дошт, ки минбаъд низ барои ба корҳои давлатию ҷамъиятӣ ва ҳам роҳбарӣ ҷалб намудани занону духтарони болаёқату кордон ва умуман баланд бардоштани нақши онҳо дар ҷомеа тадбирҳои судбахш андешида шаванд.

Сипас ҳисоботи раиси раёсати бонки давлатии амонатгузории Амонатбонк Гулнора Ҳасанова оид ба ҷалби амонатҳои аҳолӣ ва таъсири он дар низоми бонкии кишвар шунида шуд.

Тавре зикр гардид, ҳаҷми умумии пасандозҳои аҳолӣ аз соли 2005 то соли 2011 аз 18,6 миллион сомонӣ ба 277,5 миллион ва шумораи пасандозгузорандаҳо аз 72 675 ба 168 071 нафар расидааст. 15 маротиба афзудани ҳаҷми умумии пасандозҳо ва 2,3 баробар шумораи пасандозгузорандагон нишона аз афзудани боварии мардум ба Амонатбонк ва умуман бонкҳои кишвар номида шуд. Танҳо дар 9 моҳи соли равон ҳаҷми пасандозҳои аҳолӣ дар Амонатбонк 40% афзоиш ёфта, даромади софи он ба зиёда аз 7 миллиону 700 ҳазор сомонӣ расидааст.

Ҳоло Амонатбонк ба 2 миллион нафар аҳолии кишвар хизмат мерасонад ва сармояи тавозуниаш ҳолати 1 октябри соли равон 133,7 миллион сомонӣ мебошад.

Сарвари давлат Эмомалӣ Раҳмон ба фаъолияти Амонатбонк дар маҷмўъ баҳои мусбӣ дода, ҳамзамон барои боз ҳам бештар ҷалб намудани маблағҳои озоди аҳолӣ, ҳавасманд кардани мардум ба ҳамкорӣ бо бонкҳо, ба таври ғайринақдӣ додани маошу нафақа ва гузарондани тамоми амалиётҳои бонкӣ ва ҳамчунин ба роҳ мондани шабакаи ягонаи электронӣ ба роҳбарияти Амонатбонк ва роҳбарони дигар сохторҳои молия, андоз, гумрук, бонкдорӣ ва ғайра супоришҳои мушаххас дод.

Раиси Кумитаи давлатии сармоягузорӣ ва идораи амволи давлатӣ Давлаталӣ Саидов дар бораи татбиқи Консепсияи рушди соҳибкорӣ дар Ҷумҳурии Тоҷикистон дар давраи то соли 2015, ки моҳи декабри соли 2004 тасдиқ гардида буд, ҳисобот дод.

Чунонки зикр гардид, дар ин давра барои беҳ намудани фазои сиёсӣ ва ҳуқуқии соҳибкорию сармоягузорӣ корҳои зиёд ба сомон расонда шудааст. Фаъол гардидани механизми Равзанаи ягона дар бақайдгирии субъектҳои соҳибкорӣ, аз 600 то 86 адад кам кардани намудҳои иҷозатномаҳо ва бисёр корҳои дигар аз ҷумлаи тадбирҳои соддагардонии фаъолияти соҳибкорӣ арзёбӣ гардид. Аз ҳисобот бармеояд, ки дар солҳои татбиқи консепсияи мазкур дар кишвар садҳо корхонаҳои хурду миёнаи истеҳсолӣ бунёд ёфта, корхонаҳои зиёди мавҷуда навсозӣ шуданд ва ҳазорҳои ҷойҳои нави корӣ муҳайё гардид.

Прокурори генералии кишвар Шерхон Салимзода оид ба назорати иҷрои қонунгузорӣ вобаста ба истифодаи самараноку оқилонаи замин дар ноҳияҳои Вахш ва Бобоҷон Ғафуров ахбор дод.

Тавре зикр гардид, мақомоти дахлдори ноҳияҳои мазкур ба қонуншиканӣ ва ҳуқуқвайронкуниҳои ҷиддӣ дар тақсимоту истифодаи замин ва сохтмони худсаронаи хонаҳои истиқоматӣ дар заминҳои таъиноташон дигар роҳ додаанд. Ба иттилои прокурори генералӣ нисбати шумораи зиёди қонуншиканон дар ин ноҳияҳо парвандаҳои ҷиноятӣ боз шудааст. Раисони ноҳияҳои Вахш ва Бобоҷон Ғафуров бо сабаби роҳ додан ба камбудиҳои ҷиддӣ дар тақсимот ва истифодаи замин бо фармонҳои Президенти Ҷумҳурии Тоҷикистон аз вазифа озод карда шуданд.

Сарвари давлат Эмомалӣ Раҳмон ба раисони вилоятҳо, шаҳру ноҳияҳои тобеи марказ ва пойтахти кишвар, ки ба маҷлиси ҳукумат барои ҳамин масъала даъват шуда буданд, муроҷиат намуда, таъкид дошт, ки чунин қонуншиканию ҳуқуқвайронкуниҳо қариб дар тамоми шаҳру ноҳияҳо ба назар мерасанд. Ба онҳо ва роҳбарони сохторҳои масъули соҳаи замин ва мақомоти ҳифзи ҳуқуқу тартибот дастур дода шуд, ки вазъи истифодабарии заминро таҳти назорати ҷиддӣ қарор дода, қонуншиканиҳоро саривақт пешгирӣ намоянд.

Дар маҷлиси ҳукумат як зумра санадҳои нав, аз ҷумла Механизми нави маблағгузории муассисаҳои давлатии тандурустӣ, Тартиби ба иҷора супурдани амволи давлатӣ, Консепсияи сиёсати андози Ҷумҳурии Тоҷикистон барои солҳои 2011-2015, Барномаи истифодаи самараноки захираҳои обӣ, энергетикӣ ва сарфаҷўии нерўи барқ барои солҳои 2012-2016 ва ғайра тасдиқ карда шуд.

Лоиҳаи як қатор қонунҳо ва хулосаҳои Ҳукумати Ҷумҳурии Тоҷикистон ба лоиҳаи чанд қонун доир ба ворид намудани тағйиру иловаҳо ба қонунҳои амалкунандаи кишвар маъқул дониста шуда, ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод гардид. Тағйиру иловаҳо, аз ҷумла ба қонунҳо «Дар бораи реклама» ва «Дар бораи иҷора дар Ҷумҳурии Тоҷикистон» пешниҳод гардид. Хулосаи ҳукумати Ҷумҳурии Тоҷикистон ба лоиҳаи қонуни Ҷумҳурии Тоҷикистон «Дар бораи пешгирии зўроварӣ дар оила» низ пешниҳод гардид.

Дар охири маҷлис Сарвари давлат Эмомалӣ Раҳмон дар назди масъулин доир ба омодагӣ ба зимистон, тарғиби фарҳанги сарфаю сариштакорӣ, аз ҷумла истифодаи сарфакоронаи нерўи барқ, расондани кўмак ба ниёзмандон дар арафа ва рўзҳои иди қурбон ва Рўзи Конститутсияи Тоҷикистон ва тайёрӣ ба ҷамъбасти натиҷаҳои рушди иҷтимоию иқтисодии кишвар дар соли 2011 вазифаҳои мушаххас гузошт.

facebook
twitter
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
Харита
© Хадамоти матбуоти Президенти Тоҷикистон, 2005 - 2018
Тел/Факс.: (+992 37)2212520