Президенти Ҷумҳурии Тоҷикистон

Иштирок дар ифтитоҳи мактаби нав дар деҳаи Сангистони ноҳияи Айнӣ

30.10.2012 12:53, ноҳияи Айнӣ

Субҳи имрӯз Президенти кишвар Эмомалӣ Раҳмон ба деҳаи Сангистони ноҳияи Айнӣ ташриф оварда, мактаби замонавии онро мавриди баҳрабардорӣ қарор дод.

Сарвари давлат Эмомалӣ Раҳмонро дар ин деҳаи дурдасти кӯҳистони Зарафшон бо шукгузорӣ аз сиёсати ваҳдатоварӣ ва бунёдкорию созандагӣ гарму самимӣ истиқбол гирифтанд.

Барои иштирок дар ин маросими тантанавӣ ва мулоқот бо Президенти кишвар дар ин ҷо роҳбарону фаъолони ноҳия, намояндагони сершумори кормандони соҳаи маориф ва мардуми ин деҳа ҷамъ омада буданд.

Зимни шиносоӣ бо шароити таълиму тарбияи насли наврас, аз ҷумла зикр гардид, ки ин бино бо маблағи қариб 4 миллион сомонӣ аз ҳисоби буҷети кишвар барои 640 хонанда дар ду баст бунёд гардида, дорои 25 синфхонаи таълимӣ, аз ҷумла ду синфхонаи компютерии пайваст ба шабакаи ҷаҳонии интернет ва озмоишгоҳҳои фаннии физика, кимиё, биология ва технологияи ҳунаромӯзӣ мебошад.

Зимнан иттилоъ дода шуд, ки барномаи компютерикунонии мактабҳо дар ноҳияи Айнӣ пурра иҷро гардида, 53 синфхона бо 430 компютеру 90 принтер муҷаҳҳаз шудааст.

Мактаби нави деҳаи Сангистон, ҳамчунин дорои толори калону барҳавои варзишӣ мебошад, ки боиси шодию нишоти на танҳо мактаббачагон, балки ҳамаи дӯстдорони варзиш ва тарбияи ҷисмонӣ дар ин деҳа гардидааст.

Сарвари давлат Эмоалӣ Раҳмон ба масъулин дастур дод, ки дар назди мактаб, ҳамчунин ошхонаи зебою муҷаҳҳаз ва толори хуби маҷлисӣ бунёд намоянд.

Умуман, ифтитоҳи чунин бинои зебою замонавии мактаб, ки аз 2 ошёна ва шароити хуби таълиму тарбияи насли наврас иборат аст, боиси хушнудӣ ва сипосгузории кулли мардуми деҳа гардид, зеро мактаби пешинаи ин ҷо ҳанӯз солҳои 70-уми асри гузашта сохта шуда, солҳои охир хеле фарсуда шуда буд.

Сарвари давлат Эмомалӣ Раҳмон зимни суханронӣ аҳли маорифи ноҳияи Айнӣ, мардуми деҳаи Сангистон ва мактаббачагони онро бо ифтитоҳи ин боргоҳи илму маърифат табрику таҳният гуфта, онро тӯҳфаи арзанда дар арафаи таҷлили солгарди 20-уми Иҷлосияи 16-уми Шӯрои Олии Ҷумҳурии Тоҷикистон номид ва ба меъморону бинокорони мактаб арзи сипос кард.

Изҳори боварӣ карда шуд, ки насли навраси деҳаи Сангистон аз шароити хуби мактаби нав истифода карда, барои аз худ намудани илму техникаи муосир ва касбу ҳунари зарурӣ ҷаҳду талош меварзанд ва оянда дар таъмини пешрафту шукуфоии мулки бобоӣ ва умуман Тоҷикистони азиз саҳгузор мешаванд.

Зимни маҳфили озоду ошкорои пурсишу посух, ки дар охири ҷамъомад сурат гирифт, Сарвари давлат Эмомалӣ Раҳмон ба масъулини ҷумҳуриявӣ ва вилоятию маҳаллӣ доир ба вусъати бештари корҳои ободонию созандагӣ, рушди иқтидорҳои истеҳсолӣ ва муҳайё намудани ҷойҳои нави корӣ дастуру ҳидоятҳо дод.

 

facebook
twitter
Хабарҳо
Ҳамаи хабарҳо
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
Харита
© Хадамоти матбуоти Президенти Тоҷикистон
Тел/Факс.: (+992 37)2212520