Президенти Ҷумҳурии Тоҷикистон Эмомалӣ Раҳмон ба Президенти Ҷумҳурии Қирғизистон Алмазбек Отамбаев барқияи шодбошӣ ирсол намуд, ки дар он аз ҷумла омадааст:

Мӯҳтарам Алмазбек Шаршенович,

Аз самими қалб Шумо ва ҳамаи халқи Қирғизистонро бо солгарди истиқлолияти давлатии Ҷумҳурии Қирғизистон табрик менамоям.

Тоҷикистон ният дорад баҳри истифодаи иқтидори ғании муносибатҳои дӯстона, ҳусни ҳамҷаворӣ ва ҳамкориҳои мутақобилан судманд байни кишварҳои мо, ки робитаи онҳо решаҳои амиқи таърихиро дорост, тамоми саъю кӯшиши худро ба харҷ диҳад.

Ман аминам, ки ҳамкории байни давлатҳои мо минбаъд низ ба манфиатҳои халқҳои мо дар роҳи сулҳу субот ва пешравӣ ба таври рӯзафзун рушд меёбад.

Бо истифода аз ин фурсати муҳим ба Шумо, мӯҳтарам Алмазбек Шаршенович, саломативу комёбиҳо ва ба халқи дӯсти қирғиз сулҳу беҳбудӣ таманно дорам.