Президенти Ҷумҳурии Тоҷикистон

Ифтитоҳи марҳилаи якуми корхонаи парандапарварии ҶДММ “Баҳори пурфайз” ва боздид аз намоиши дастовардҳои сокинони шаҳри Ваҳдат

10.11.2022 10:20, шаҳри Ваҳдат
Ифтитоҳи марҳилаи якуми корхонаи парандапарварии ҶДММ “Баҳори пурфайз” ва боздид аз намоиши дастовардҳои сокинони шаҳри Ваҳдат  10.11.2022

Дар идомаи сафари корӣ дар шаҳри Ваҳдат Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон марҳилаи якуми корхонаи парандапарварии ҶДММ “Баҳори пурфайз”-ро мавриди баҳрабардорӣ қарор доданд.

Ба хотири рушди соҳаи парандапарварӣ дар мамлакат ва таъмини бозорҳои дохилӣ бо маҳсулоти аълосифати ватанӣ аз ҷониби Ҳукумати Ҷумҳурии Тоҷикистон як қатор имтиёзу сабукиҳо ҷорӣ карда шудааст. Бо истифода аз чунин имтиёзҳо Корхонаи парандапарварии “Баҳори пурфайз”-ро соҳибкори маҳаллӣ Эргаш Отаҷонов бунёд намуд, ки дар он 30 нафар сокини маҳаллӣ соҳиби ҷойи кори доимӣ гардиданд.

Ҷамъият ба истеҳсоли гушти паранда машғул буда, имкон дорад, ки дар як сол то 1 ҳазору 600 тонна гӯшти парҳезии мурғро ба бозорҳои мамлакат ба фуруш барорад. Дар як марҳилаи парвариши паранда, ки то 45 рӯзро дар бар мегирад, дар корхонаи нав 120 ҳазор сар мурғ нигоҳубин карда мешавад ва ҳамин гуна, дар як сол то 600 ҳазор сар паранда парвариш шуда, барои истеҳсоли гушти аълосифат омода мегардад.

Зимни боздид иттилоъ дода шуд, ки корхонаи парандапарварӣ дар асоси технологияи туркӣ фаъолият намуда, тақсими дону об ба парандаҳо ба таври автоматӣ ҷараён мегирад. Ҳамчунин ҳарорати дохили фермаро дастгоҳҳои муосири соҳавӣ назорат намуда, мутобиқи талаботи соҳавӣ ҳавои дохил ба таври автоматӣ иваз карда мешавад. Вижагии дигари корхонаи навбунёд дар он аст, ки гармии дохили фермаҳои парандапарварӣ дар сардиҳои зимистон тариқи гармии системаи ба воситаи дегхонаи алоҳида фаъолияткунанда, таъмин мегардад.    

Бояд гуфт, ки ҶДММ “Баҳори пурфайз” дар масоҳати 7,5 гектар замин бунёд гардида, аз 9 бинои якошёна ва 2 бинои дуошёна иборат аст. Сохтмони фермаи дуошёнаи парандапарварӣ дар минтақа беназир буда, имконият медиҳад, ки саршумораи паранда барои нигоҳубин ва истеҳсоли гушт зиёд карда шавад. Танҳо дар як бинои дуошёна ҳоло ҷамъият то 40 ҳазор сар чӯҷаро нигоҳубин намуда, барои дуруст калон шудану вазнгирии онҳо шароити зарурӣ фароҳам оварда шудааст.

“Баҳори пурфайз” нигоҳубин ва парвариши мурғи навъи “Бройлер”-ро роҳандозӣ намуда, тибқи баҳогузории мутахассисони соҳа, ин намуди паранда барои истеҳсоли гушти парҳезӣ мутобиқу муносиб аст. Он то 2,5 килограмм вазн гирифта, таъму лаззати хоса дорад.

Маҳсулоти истеҳсолнамудаи корхона барои таъмини эҳтиёҷоти дохилӣ ба бозорҳои шаҳру ноҳияҳои ҷумҳурӣ ба фуруш бароварда мешавад.

Дар оянда ҳам истеҳсоли гӯшти парҳезии паранда дар ҷамъият афзоиш дода мешавад ва ҳам шумораи ҷойҳои нави корӣ бештар мегардад, зеро дар марҳилаи дуюм дар ҳудуди корхона бунёди боз 1 бинои дуошёна ва 1 бинои якошёнаи парандапарварӣ дар назар дошта шудааст, ки дар ин ду бино боз  парвариши 60 ҳазор сар мурғ роҳандозӣ мегардад. Ба ин васила боз наздик ба 10 нафар ба кори доимӣ ҷалб хоҳанд шуд.

Зимни шиносоӣ бо фаъолияти корхонаи навбунёд, Сарвари давлат иқдоми соҳибкори ватандӯстро шоистаи таҳсин арзёбӣ намуда, барои боз ҳам афзун кардани саршумор ва тақвияти иқтидори истеҳсолӣ дастуру ҳидоятҳо доданд.

Дар саҳни корхонаи навбунёд Президенти Ҷумҳурии Тоҷикистон муҳтарам Эмомалӣ Раҳмон аз намоиши маҳсулоти корхонаи мазкур ва кишоварзони шаҳри Ваҳдат дидан намуданд.

Дар ин намоиш намудҳои гуногуни маҳсулоти ниҳоии паранда, ки бо шаклу намудҳои бозоргир бастабандӣ гардидааст, пешниҳод карда шуд.

facebook
twitter
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
© Хадамоти матбуоти Президенти Тоҷикистон
Тел/Факс.: (+992 37)2212520