Субҳи рӯзи 11 – уми феврал Президенти Ҷумҳурии Тоҷикистон Эмомалӣ Раҳмон бо Дабири кулли Паймони Атлантикаи Шимолӣ (НАТО) Яаап Де Хооп Схеффер мулоқот намуд.
«НАТО чун ҷузъи муҳими нерӯи таъмини сулҳ дар Афғонистон бояд бо мамолики ҳамсоя ва бахусус Тоҷикистон, ки дар Осиёи Миёна бо Афғонистон сарҳади аз ҳама тӯлонӣ дорад, ҳамкории фаъолонаро ба роҳ монад», изҳор дошт зимни сӯҳбат Президенти Ҷумҳурии Тоҷикистон Эмомалӣ Раҳмон.
Ба андешаи Эмомалӣ Раҳмон, амалиётҳои низомӣ дар Афғонистон бояд бо муборизаи беамон бар зидди истеҳсоли маводи мухаддир ва ҳамчунин бо татбиқи васеъи барномаҳои иҷтимоию иқтисодӣ дар ҳамбастагӣ сурат гиранд.
Яаап Де Хооп Схеффер ба нақши Тоҷикистон дар минтақа ва ҳамгироии он ба нерӯҳои НАТО дар Афғонистон баҳои баланд дод.
Дар чаҳорчӯби барномаи «Шарикӣ баҳри сулҳ» ва нақшаҳои дигари ҳамкорӣ бо НАТО оид ба ҷудо намудани техникаю таҷҳизоти нав ба сарҳадбонони тоҷик, ҳамгироӣ бо сарҳадбонони афғон, омода кардани кадрҳои низомӣ ва гузарондани тадқиқоти илмӣ гуфтугӯйи судманд сурат гирифт.
Таваҷҷӯҳи зиёд ба истифодаи потенсиали НАТО дар татбиқи лоиҳаҳои гидроэнергетикии Тоҷикистон зоҳир карда шуд.
Пешниҳодҳо баҳри кушодани Маркази махсуси НАТО дар Тоҷикистон, таъсиси Маркази наҷотдиҳӣ дар шаҳри Душанбе, бо таҷҳизоти замонавӣ муҷаҳҳаз гардонидани системаи огоҳкунонӣ аз офатҳои табиӣ ва аз минаҳо тоза кардани марзи давлатӣ бо Афғонистон баррасӣ шуд.
Масоили омодагӣ ба ҷаласаи барномаи «Шарикӣ баҳри сулҳ»-и НАТО, ки имсол дар Остона баргузор мегардад, низ баррасӣ шуд.
Президенти Ҷумҳурии Тоҷикистон Эмомалӣ Раҳмон аз Дабири кулли Паймони Атлантикаи Шимолӣ (НАТО) Яаап Де Хооп Схеффер даъват намуд, ки ба Тоҷикистон бо сафари расмӣ ташриф биёрад.