Субҳи имрӯз ба Президенти Ҷумҳурии Тоҷикистон Эмомалӣ Раҳмон раиси Вилояти Мухтори Кӯҳистони Бадахшон, раисони вилоятҳои Суғду Хатлон, шаҳрҳои Исфара, Конибодом, Истаравшан, Панҷакент ва ноҳияҳои Ҷиргатолу Тавилдара аз натиҷаи корҳояшон дар семоҳаи аввали соли равон ва рафти иҷрои вазифаҳои минбаъда ҳисобот доданд.
Таваҷҷӯҳи махсус ба рафти киштукори баҳорӣ, ниҳолшинонӣ, кӯмакрасонӣ ба деҳқонон, вусъат додани корҳои ободонӣ, фаъолияти корхонаҳои саноатӣ, муҳайё намудани ҷойҳои нави корӣ ва гузарондани ярмаркаҳои ҷойҳои холии корӣ ва ба пардохти саривақтии маошу нафақа зоҳир карда шуд. Сарвари давлат Эмомалӣ Раҳмон ба онҳо оид ба ҷоннок намудани корҳо дар ин ва дигар самтҳои фаъолият, аз ҷумла доир ба истифодаи пурсамар аз ҳар ваҷаб замини корам, ба кор даровардани иқтидорҳои истеҳсолии корхонаҳои саноатӣ ва афзун намудани истеҳсолоти ватанӣ супоришҳои қатъӣ дод.