Президенти Ҷумҳурии Тоҷикистон

Маҷлиси Ҳукумати Ҷумҳурии Тоҷикистон

30.06.2009 19:00, шаҳри Душанбе

Таҳти раёсати Президенти Ҷумҳурии Тоҷикистон, Раиси Ҳукумати мамлакат Эмомалӣ Раҳмон маҷлиси навбатии Ҳукумати Ҷумҳурии Тоҷикистон баргузор гашт, ки дар кори он наздики 50 масъалаи муҳим баррасӣ шуд.

Дар маҷлиси навбатӣ нахуст масъалаи кадрҳо баррасӣ шуд. Аз ҷумла Имомов Азизмат Муовини якуми вазири адлия ва Ҳайдар Одинаев Директори иҷроияи Филиали Донишгоҳи давлатии Маскав ба номи Ломоносов дар шаҳри Душанбе таъин гардиданд.

Сарвари давлат Эмомалӣ Раҳмон нафарони ба вазифаҳои пурмасъулият таъиншударо ба кори пурсамар ва софдилонаю садоқатмандона ҳидоят намуд.

Нақшаи кори Ҳукумати Ҷумҳурии Тоҷикистон дар нимсолаи дуюми соли 2009 тасдиқ карда шуд.

Сипас ҳисоботи Директори генералии Корхонаи воҳиди давлатии «Хоҷагии манзилию коммуналӣ» оид ба рафти иҷрои «Барномаи беҳтар намудани таъмини аҳолии Ҷумҳурии Тоҷикистон бо оби тозаи нӯшокӣ барои солҳои 2007-2020» шунида шуд.

Аз ҷумла зикр гардид, ки барномаи мазкур бо харҷи 3 миллиарду 324 миллиону 844 ҳазор сомонии аз ҳисоби маблағҳои мутамаркази ҷумҳуриявӣ маҳаллӣ ва сармоягузории хориҷӣ амалӣ шуда, ҳадаф аз он беҳтарнамоии кори шабакаҳои обу корез ва дигар хизматрасониҳои коммуналӣ дар саросари мамлакат аст. Чандин лоиҳаҳои калонҳаҷми инвеститсионӣ дар ин соҳа амалӣ мешаванд, ки маблағи умумии онҳо беш аз 500 миллион сомониро ташкил медиҳад.

Сарвари давлат Эмомалӣ Раҳмон баҳри истифодаи ҳадафноки маблағҳои ҷудогашта ва татбиқи босамари ҳадафҳои барнома, пеш аз ҳама беҳ намудани таъмини аҳолӣ бо оби нӯшокӣ ба масъулин супоришҳои мушаххас дод.

Дар бораи рафти иҷрои Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ» ва Қонуни Ҷумҳурии Тоҷикистон «Дар бораи мақомоти худидораи шаҳрак ва деҳа» дар ноҳияи Мир Сайид Алии Ҳамадонӣ Раиси ин ноҳия ҳисобот дод.

Раиси ноҳия вазифадор карда шуд, ки ҳамоҳангии кори мақомоти намояндагӣ ва иҷроияро хуб ташкил намуда, кори пурсамари ҳокимияти давлатиро ба роҳ монад ва бо ҷалби сармояи дохилию хориҷӣ фаъолияти бунёдкорию созандагӣ ва ободониро дар ноҳия пурзӯр созад.

Ӯ ҳамчунин вазифадор карда шуд, ки хоҷагии ниҳолпарварии ноҳияро пурра барқарор ва корашро пурсамар намояд.

Лоиҳаи ду қонун оид ба ворид намудани тағйиру иловаҳо ба қонунҳо «Дар бораи ҳуқуқи муаллиф ва ҳуқуқҳои вобаста ба он» ва «Дар бораи энергетика» маъқул дониста шуда, ба баррасии Маҷлиси намояндагони Маҷлиси олии Ҷумҳурии Тоҷикистон пешниҳод карда шуд.

Барномаи ҳамгироии илм ва таҳсилоти олии Ҷумҳурии Тоҷикистон барои солҳои 2010-2015, Барномаи «Ҷавонони Тоҷикистон» барои солҳои 2010-2012, Барномаи рушди кори бойгонӣ дар Ҷумҳурии Тоҷикистон барои солҳои 2009-2018 ва Қоидаҳои тартиби барасмиятдарорӣ, додан, бақайдгирӣ, иваз намудан ва аз эътибор соқит намудани Сертификати ҳуқуқи истифодаи замин ва Шаҳодатномаи саҳми замин тасдиқ гардиданд.

Ба баррасии Маҷлиси намояндагони Маҷлиси олии Ҷумҳурии Тоҷикистон ҳамчунин тағйиру иловаҳо ба қонунҳо «Дар бораи таъмини нафақаи шаҳрвандони Ҷумҳурии Тоҷикистон», «Дар бораи вазъи ҳуқуқии шаҳрвандони хориҷӣ дар Ҷумҳурии Тоҷикистон», «Дар бораи ҳаракат дар роҳ» ва хулосаҳои Ҳукумати Ҷумҳурии Тоҷикистон дар бораи ворид намудани тағйиру иловаҳо ба як қатор санадҳои дигари қонунгузории мамлакат пешниҳод гардиданд.

Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Латвия оид ба алоқаи ҳавоӣ тасдиқ карда шуд.

Барномаи «Беҳбуди фазои соҳибкорӣ-200 рӯзи ислоҳот» тасдиқ карда шуд, ки ҳадаф аз он боз ҳам беҳтар намудани фазои сиёсию ҳуқуқии соҳибкорӣ ва ҷалби сармояи дохилию хориҷӣ ба иқтисодиёти мамлакат аст.

Ҳамчунин як қатор санадҳои дигари меъёрию ҳуқуқӣ тасдиқ карда шуданд, аз ҷумла Низомномаи намунавии муассисаи таҳсилоти умумии ғайридавлатӣ (хусусӣ) дар Ҷумҳурии Тоҷикистон, Стандарти давлатии таҳсилоти томактабии Ҷумҳурии Тоҷикистон, Тартиби гузаронидани ташхиси давлатии диншиносӣ, Қоидаҳои татбиқи чораҳои мубориза бар зидди саркашӣ аз андозсупорӣ ва усулҳои алтернативии андозбандӣ, Қоидаҳои баргардонидани маблағҳои буҷетӣ аз ҳисоби мутахассисони ҷавон, ки тибқи роҳхат ба ҷойи кор ҳозир нашудаанд.

Оид ба номгузории корхонаҳои давлатӣ, ташкилоту муассисаҳо ва абадӣ гардонидани хотираи ходимони илм, маориф ва фарҳанг комиссияи ҷумҳуриявӣ ва оид ба дастгирии молистеҳсолкунандагони ватанӣ ва ҳимояи бозори дохилӣ комиссияи байниидоравӣ таъсис дода шуд.

Дар заминаи Корхонаи воҳиди давлатии «Ҳавзи шиноварии ҷумҳуриявӣ» Муассисаи давлатии «Мактаби ҷумҳуриявии махсуси намудҳои варзиши обӣ» таъсис дода шуд.

Қарор дар бораи таъсис додани Муассисаи давлатии «Институти илмӣ-тадқиқотии «Диапазон» қабул карда шуд.

Ба Вазорати корҳои хориҷӣ 4 воҳиди иловагии штатӣ барои тақвият бахшидани кор бо муҳоҷирони меҳнатӣ дар хориҷи кишвар дода шуд.

Дар фароварди маҷлис Сарвари давлат Эмомалӣ Раҳмон тавачҷӯҳи масъулинро ба масоили вобаста ба тезондани корхои сохтмонӣ дар иншооти сершумори Вилояти Мухтори Кӯҳистони Бадахшон ва шаҳраки Навободи ноҳияи Нуробод, ҷоннок намудани кори корхонаҳои саноатӣ, омодагӣ ба зимистон, аз ҷумла ба захираи фаровони ангишт, гази моеъ, озуқаворӣ ва ба кор тайёр кардани шабакаҳои гармидиҳӣ ва ҳамчунин ба тезондани ҷамъоварии ҳосили фаровони ғалладона ва гузарондани кишти такрорӣ ва захирасозии тухмии ғалладона ва сабзавот ҷалб намуда, баҳри татбиқи босамари ин ҳадафҳо дар назди онҳо вазифаҳои мушаххас гузошт.

facebook
twitter
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
© Хадамоти матбуоти Президенти Тоҷикистон
Тел/Факс.: (+992 37)2212520