Президенти Ҷумҳурии Тоҷикистон

Ифтитоҳи Муассисаи таълимии хусусии “Ворисони илм” дар шаҳри Бӯстон

07.10.2021 10:00, шаҳри Бӯстон
Ифтитоҳи Муассисаи таълимии хусусии “Ворисони илм” дар шаҳри Бӯстон  07.10.2021

7 октябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ ба шаҳру ноҳияҳои вилояти Суғд дар шаҳри Бӯстон бинои муассисаи таълимии хусусии “Ворисони илм”-ро мавриди баҳрабардорӣ қарор доданд.

Мактаби хусусии “Ворисони илм” дар доираи сиёсати маорифпарваронаи Президенти мамлакат муҳтарам Эмомалӣ Раҳмон баҳри сазовор истиқбол намудани ҷашни 30-солагии Истиқлолияти давлатӣ бо ташаббуси оилаи Рауповҳо бо харҷи беш аз 5 миллион сомонӣ бунёд гардидааст.

Бинои мактаб аз се ошёна иборат буда, дар он 18 адад синфхона бо 460 ҷойи нишаст ва дигар ҳуҷраҳои корӣ ҷой дода шудааст. Муассисаи таълимӣ дорои маркази гармидиҳӣ буда, бо тамоми шароити муосири таълим сохта шудааст.

 Таҳсил дар муассисаи навбунёд бо забони русӣ ба роҳ монда шуда, омӯзиши забонҳои англисӣ ва хитоӣ низ дар назар дошта шудааст. Илова бар ин, дар доираи эълон шудани солҳои 2020-2040-“Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи маориф” дар мактаби “Ворисони илм” тадбирҳои муҳим амалӣ карда мешаванд.

Дар саҳни мактаб майдончаи варзишӣ бунёд гардида, барои ҷалби наврасону ҷавонон ба машғулиятҳои варзишӣ шароити мусоид фароҳам оварда шудааст. Ҳамзамон дар ошёнаи сеюми бинои нави таълимии хусусии “Ворисони илм” толори варзишӣ ҷой дода шуда, хонандагон ба бозиҳои баскетбол, волейбол ва намуди каратэ ҷалб карда мешаванд.   

Президенти мамлакат муҳтарам Эмомалӣ Раҳмон бо хонандагони муасисаи таълимии хусусӣ суҳбат намуда, аз таваҷҷуҳи рӯзафзуни Ҳукумати мамлакат нисбат ба соҳаи маориф ёдоварӣ шуданд. Таъкид гардид, ки ҳамаи ин ғамхориҳо барои ояндаи дурахшони насли наврас мебошад. Дар ҷавоб ба ин наврасону ҷавононро мебояд хуб таҳсил намуда, дар оянда ҳамчун фарзандони содиқ ба халқу Ватани худ хизмати шоиста намоянд.

Президенти мамлакат муҳтарам Эмомалӣ Раҳмон бо шароити таълиму тарбия дар кӯдакистони хусусии “Ворисони илм”, ки соли 2015 аз ҷониби оилаи Рауповҳо бунёд гардидааст, шинос шуданд.

Айни замон дар ин муассисаи томактабӣ 100 нафар кӯдак ба таълиму тарбия фаро гирифта шудаанд. Ба дӯструякон туҳфаҳои Пешвои муаззами миллат муҳтарам Эмомалӣ Раҳмон тақдим карда шуд, ки кӯдакони хуштолеъ аз  ғамхории Сарвари давлат хеле шоду мамнун гардиданд.

Дар шаҳри Бӯстон шумораи муассисаҳои таълимии томактабӣ 12 адад буда, дар онҳо беш аз 2 ҳазор кӯдак дар рӯҳияи ватандӯстӣ ва ифтихори миллӣ ба камол мерасанд. Барои баланд бардоштани сатҳу сифати таълиму тарбия дар муассисаҳои соҳаи маориф аз ҷониби Мақомоти иҷроияи ҳокимияти давлатии шаҳри Бӯстон тадбирҳои муҳиму саривақтӣ андешида шудааст.

 

facebook
twitter
Хабарҳо
Ҳамаи хабарҳо
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
Харита
© Хадамоти матбуоти Президенти Тоҷикистон
Тел/Факс.: (+992 37)2212520