Президенти Ҷумҳурии Тоҷикистон

Маҷлиси Ҳукумати Ҷумҳурии Тоҷикистон

27.07.2009 19:00, шаҳри Душанбе

Таҳти раёсати Президенти Ҷумҳурии Тоҷикистон, Раиси Ҳукумати мамлакат Эмомалӣ Раҳмон маҷлиси навбатии Ҳукумати Ҷумҳурии Тоҷикистон баргузор гашт, ки дар кори он беш аз 50 масъала баррасӣ шуд.

Дар маҷлиси Ҳукумати Ҷумҳурии Тоҷикистон нахуст Номгӯйи нави хочагиҳои истеҳсолкунандаи тухмии зироатҳои кишоварзӣ ва зерташкилотҳои тухмипарвари Академияи илмҳои кишоварзии Тоҷикистон тасдиқ карда шуд. Вазорату идораҳои дахлдор вазифадор гардиданд, ки ба ин сохторҳо дар вусъат додани корҳои илмию истеҳсолии вобаста ба парвариши тухмии зироатҳои кишоварзӣ мусоидат намоянд.

Илтимосномаи Маҷлиси вакилони халқи Вилояти Мухтори Кӯҳистони Бадахшон оид ба кӯчондани маркази маъмурии ноҳияи Шуғнон аз шаҳри Хорӯғ ба деҳаи Миденшори деҳоти Поршиневи ноҳияи Шуғнон дастгирӣ ёфта, ба баррасии Маҷлиси миллии Маҷлиси Олии Ҷумҳурии Тоҷикистон пешниҳод карда шуд.

Ҳамчунин лоиҳаҳои як қатор қонунҳо дар бораи ворид намудани тағйиру иловаҳо ба санадҳои амалкунандаи қонунгузорӣ маъқул дониста шуда, ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод гардиданд. Тағйиру иловаҳо, аз ҷумла ба қонунҳои Ҷумҳурии Тоҷикистон «Дар бораи металҳои қиматбаҳо ва сангҳои қиматбаҳо» ва «Дар бораи фаъолияти оперативӣ-ҷустуҷӯӣ» пешниҳод карда шуд.

Созишнома оид ба маблағгузорӣ байни Ҷумҳурии Тоҷикистон ва Бонки Умумиҷаҳонӣ (Ассотсиатсияи байналмилалии рушд), ки мутобиқи он ба Лоиҳаи тандурустии ҷамоавӣ ва заминавӣ 3 миллиону 400 ҳазор доллари амрикоӣ маблағҳои иловагии грантӣ ҷудо мегарданд, тасдиқ карда шуд. Ҳамчунин ду созишномаи дигар оид ба ҳамкории иқтисодию тиҷоратӣ, саноатӣ ва техникӣ бо Италия ва Муғулистон тасдиқ карда шуд.

Якчанд санадҳои меъёрию ҳуқуқӣ низ тасдиқ гардиданд, аз ҷумла Низомномаи намунавии муассисаҳои таълимӣ барои хонандагони болаёқат, Тартиби ташаккул ва истифодаи «Фонди стабилизатсионӣ оид ба рушди иқтисод», Таснифи захираҳои конҳо ва манбаъҳои пешбинигардидаи канданиҳои фоиданок.

Мутобиқи қарори дигари имрӯз қабулшуда тарифҳои нерӯи барқ ва гармӣ аз 1 – уми августи соли равон тағйир меёбанд.

Бо қарорҳои Ҳукумати мамлакат Корхонаи воҳиди давлатии ҷумҳуриявии «Экспедитсияи иктишофию геологии сангҳои қиматбаҳо ва ороишӣ» ва Муассисаи давлатии таълимии «Коллеҷи муҳандисию омӯзгории ноҳияи Рӯдакӣ» таъсис дода шуданд ва Муассисаи давлатии таълимии «Донишкадаи тарбияи ҷисмонии Тоҷикистон» ба номи Саидмуъмин Раҳимов номгузорӣ гардид.

Дар охири маҷлис Сарвари давлат Эмомалӣ Раҳмон вобаста таъсири манфии бӯҳрони ҷаҳонии молиявӣ ба иқтисодиёти Тоҷикистон ба аъзои Ҳукумат ва мардуми кишвар муроҷиат карда, онҳоро бори дигар ба истифодаи пурсамар аз тамоми заминҳои корам, хусусан заминҳои обӣ, васеъ ба роҳ мондани кишти такрорӣ ва ба 200 ҳазор гектари нақша расондани майдони он ва ба таъмини фаровонӣ дар бозори истеъмолӣ даъват намуд ва таъкид дошт, ки бо истифода аз обу ҳавои мусоиди имсола ва ҳосили фаровони ғалладона маводи озуқаворӣ ва хӯроки чорво барои ду соли оянда бояд захира карда шавад.

Роҳбарони вазорату идораҳои дахлдор ҳамчунин вазифадор гардиданд, ки ғалладонаи аз талаботи худ зиёд истеҳсолнамудаи деҳқононро харидорӣ карда, захираҳои давлатиро бештар аз ҳисоби маҳсулоти ватанӣ таъмин намоянд.

Президенти мамлакат Эмомалӣ Раҳмон ҳамчунин оид ба омодагии ҷиддӣ ба зимистони пешомад, чорабиниҳои илмию фарҳангии бахшида ба 1310 – солагии Имоми Аъзам ва вусъат додани корҳои ободонию созандагӣ дар шаҳру ноҳияҳои Вилояти Мухтори Кӯҳистони Бадахшон дар назди масъулин вазифаҳои мушаххас гузошт.

Аз ҷумла таъкид гардид, ки корҳои лоиҳакашӣ ва сохтмону навсозии варзишгоҳ, гимназияи президентӣ, қасри ҷавонон, театри ба номи Меҳрубон Назаров, кинотеатр, чойхонаи миллӣ, хобгоҳи донишҷӯён, беморхонаи марказии вилоятӣ, бинои телевизион ва радиои вилоятӣ, биноҳои прокуратура ва раёсати корҳои дохилӣ ва таъмири асосии биноҳои сохторҳои зертобеи тамоми вазорату идораҳо дар шаҳри Хорӯғ ва ҳамчунин таъмири роҳҳои ин шаҳр тезонда шавад. Супоришҳои мушаххас ҳамчунин оид ба тезондани сохтмону навсозии 8 мактаб ва қасри фарҳанг дар ноҳияи Дарвоз, яктогӣ варзишгоҳ дар ноҳияҳои Ванҷу Роштқалъа, як мактаб-интернат ва се мактаби дигар дар ноҳияи Рӯшон, беморхонаи минтақавӣ, 2 мактаб ва бунгоҳи тиббӣ дар ноҳияи Шуғнон ва як нерӯгоҳи хурди обӣ дар ноҳияи Мурғоб дода шуд.

Хотиррасон бояд намуд, ки мутобиқи супоришҳои Президенти Ҷумҳурии Тоҷикистон то тобистони соли оянда шумораи зиёди мактабҳо, беморхонаҳои минтақавию бунгоҳҳои тиббӣ ва биноҳои сохторҳои зертобеи тамоми вазорату идораҳо дар ҳамаи ноҳияҳои Вилояти Мухтори Кӯҳистони Бадахшон мавриди сохтмон ва ё таъмиру навсозӣ қарор мегиранд.

facebook
twitter
Хабарҳо
Ҳамаи хабарҳо
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
Харита
© Хадамоти матбуоти Президенти Тоҷикистон
Тел/Факс.: (+992 37)2212520