ИМОМЗОДА Муҳаммадюсуф Сайдалӣ
Вазири маориф ва илми Ҷумҳурии Тоҷикистон
Имомзода Муҳаммадюсуф 28 апрели соли 1959 таваллуд шудааст. Миллаташ тоҷик, таҳсилот олӣ. Соли 1981 Донишгоҳи миллии Тоҷикистонро бо ихтисоси филолог, муаллими забон ва адабиёти тоҷик хатм намудааст. Доктори илми филология, узви пайвастаи Академияи илмҳои Ҷумҳурии Тоҷикистон мебошад.
Фаъолияти меҳнатиро соли 1981 аз лаборанти Пажӯҳишгоҳи забон ва адабиёти Академияи илмҳо оғоз намуда, сипас ҳамчун муҳаққиқ-коромӯзи Институти адабиёти ҷаҳонии Академияи илмҳои ИҶШС, Аспиранти Пажӯҳишгоҳи забон ва адабиёти Академияи илмҳо ва ходими хурди илмии Пажӯҳишгоҳи забон ва адабиёти Академияи илмҳои Ҷумҳурии Тоҷикистон фаъолияти худро идома додааст.
Аз соли 1991 то соли 2004 дар вазифаҳои лаборанти калон, омӯзгори калони кафедраи назария ва адабиёти навини тоҷикӣ, муовини декани факултаи филология, дотсенти кафедраи назария ва адабиёти навини тоҷикӣ ва декани факултаи филологияи Донишгоҳи давлатии миллии Тоҷикистон кор кардааст.
Солҳои 2004-2012 Ректори Донишгоҳи славянии Тоҷикистону Россия.
Аз соли 2012 то соли 2020 дар вазифаи Ректори Донишгоҳи миллии Тоҷикистон фаъолият намудааст.
Солҳои 2015-2020 Узви Маҷлиси миллӣ, Раиси Кумитаи Маҷлиси миллии Маҷлиси Олии Ҷумҳурии Тоҷикистон оид ба ҳамоҳангсозии фаолияти Маҷлиси миллӣ бо Маҷлиси намояндагон, ҳокимияти иҷроия, иттиҳодияҳои ҷамъиятӣ, воситаҳои ахбори омма ва робитаҳои байнипарламентӣ буд.
Бо Фармони Президенти Ҷумҳурии Тоҷикистон аз 24 январи соли 2020 Вазири маориф ва илми Ҷумҳурии Тоҷикистон таъин гардидааст.
Бо Фармони Президенти Ҷумҳурии Тоҷикистон аз 3 ноябри соли 2020 бинобар таъсиси Ҳукумати нав Вазири маориф ва илми Ҷумҳурии Тоҷикистон таъин гардидааст.