Президенти Ҷумҳурии Тоҷикистон

Гузоштани санги асоси корхонаи истеҳсоли қубурҳои шишапластикии “Композит Т.А.” дар шаҳри Душанбе

17.09.2019 11:58, шаҳри Душанбе

17 сентябр Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси шаҳри Душанбе муҳтарам  Рустами Эмомалӣ дар маҳаллаи Чортеппаи ноҳияи Синои шаҳри Душанбе бо гузоштани санги асос ба бунёди корхонаи истеҳсоли қубурҳои шишапластикии “Композит Т.А.” оғози расмӣ бахшиданд.

Дар рафти корҳои бунёдгарӣ наздики 100 нафар мутахассисону бинокорони ботаҷриба  ба кор ҷалб мегарданд. 

Зимни шиносоии лоиҳаи корхонаи истеҳсоли қубурҳои шишапластикӣ ба Пешвои миллат муҳтарам Эмомалӣ Раҳмон иттилоъ дода шуд, ки дар корхона қубурҳои шишапластикии қутрашон 300 ва 3000 мм истеҳсол гардида, иқтидори солонаи он ба 150 км баробар хоҳад шуд. Қубурҳои мазкур новобаста аз дарозӣ ва ҳаҷм хеле сабук буда, аз лиҳози насбнамоӣ ва истифодабарӣ хеле содда ва осон мебошад. Ҳамчунин қубурҳои шишапластикӣ ба фишори баланд тобовар буда, оташбардор ва ба стандартҳои ҷаҳонӣ ҷавобгӯ аст.    

Бино ба иттилои масъулин барои омода намудани маҳсулот, наздики 60 фоизи ашёи хом аз дохили кишвар дастрас карда мешавад. Мавриди зикр аст, ки ҳамсола дар ҷумҳурӣ лоиҳаҳои бузург дар соҳаи таъминоти аҳолӣ бо оби тозаи ошомиданӣ, обёрӣ ва корезӣ, ки аз сарчашмаҳои гуногун, аз ҷумла аз ҳисоби буҷети давлатӣ, грантҳо ва ё қарзҳои шарикони рушд маблағгузорӣ мегарданд, татбиқ мешаванд. Қубурҳое, ки ҳангоми амалинамоии лоиҳаҳои мазкур истифода мешаванд, асосан аз хориҷи кишвар харидорӣ мегарданд. Акнун баъд аз фаъол кардани корхонаи истеҳсоли қубурҳои шишапластикӣ дар шаҳри Душанбе, маҳсулоти он ивазкунандаи воридот гардида, ба буҷети кишвар низ таъсири мусбӣ хоҳад расонд.

Корхонаи мазкур дар миқёси ҷумҳурӣ назир надошта, он дар масоҳати умумии 4 гектар бунёд хоҳад шуд ва дар оянда қубурҳои истеҳсолшаванда барои мамлакат маҳсулоти ивазкунундаи воридот ва содиротӣ ба ҳисоб меравад. Корхонаи истеҳсоли қубурҳои шишапластикӣ давоми 1,5 соли оянда бунёд гардида, дар сурати пурра ба истифода додани он беш аз 100 нафар бо кори доимӣ ва маоши хуб таъмин хоҳанд шуд.

Пешвои миллат муҳтарам Эмомалӣ Раҳмон ба сохтмончиёни коргоҳи мазкур барои иҷрои босифати корҳои бунёдӣ ва дар муҳлати пешбинигардида ба истифода додани он, муваффақиятҳо орзу намуданд.   

facebook
twitter
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
© Хадамоти матбуоти Президенти Тоҷикистон
Тел/Факс.: (+992 37)2212520