Сарвари давлати Тоҷикистон Эмомалӣ Раҳмон дар ҷаласаи навбатии Шўрои байнидавлатии Иттиҳоди иқтисодии Авруосиё, ки нимаи дуюми рўзи 9 – уми декабр баргузор гардид, иштирок ва суханронӣ кард.
Хотиррасон бояд намуд, ки ба ин созмони минтақавӣ Тоҷикистон, Русия, Беларус, Қазоқистон ва Қирғизистон аъзо мебошанд. Узбекистон узвияти худро мавқуф намуда, Арманистон дар он мақоми нозирро доро аст.
Дар ин ҳамоиш асосан масоили вобаста ба таъсис ва ташкили фаъолияти Иттиҳоди гумрукӣ ва Фазои ягонаи иқтисодӣ дар қаламрави Иттиҳоди иқтисодии АвруОсиё, ташкили бозори энергетикӣ ва иттиҳоди нақлиётӣ, ҳамгироӣ дар бахшҳои воқеии иқтисодӣ, иҷтимоию гуманитарӣ ва ҳамчунин масъалаҳои амнияти озуқаворӣ, муҳоҷирати меҳнатӣ ва такмили низоми идории созмон баррасӣ шуд.
Дар суханронии Сарвари давлати Тоҷикистон Эмомалӣ Раҳмон, аз ҷумла зикр гардид, ки «фаъолияти Шўрои Иттиҳоди иқтисодии АвруОсиё оид ба сиёсати молиявӣ-иқтисодӣ дар татбиқи тадбирҳои муштарак барои бартараф намудани оқибатҳои бўҳрони молявӣ ҷаҳонӣ бояд ҷоннок карда шавад».
Ба андешаи Эмомалӣ Раҳмон, «дастгирии интиқоли мутақобилаи молу маҳсулот, татбиқи лоиҳаҳои муштараки сармоягузорӣ ва ҳамдастии истеҳсолӣ дар шароити имрўза басо муҳиманд, зеро ба ин васила мо метавонем ҷойҳои нави корӣ ва барои соҳибкорону тоҷирон бозорҳои нав муҳайё созем».