Президенти Ҷумҳурии Тоҷикистон

Тантанаҳои Рӯзи Ғалабаи бузург дар шаҳри Душанбе

09.05.2012 11:00, шаҳри Душанбе

Имрӯз дар боғи Ғалабаи пойтахт бо иштироки Президенти кишвар Эмомалӣ Раҳмон ба ифтихори солгарди 67-уми Ғалаба дар Ҷанги Бузурги Ватании солҳои 1941-1945 маросими тантанавии гулчанбаргузорӣ ва расми гузашти низомӣ баргузор гардид.

Ба ин муносибат дар ин ҷо роҳбарияти давлату ҳукумат, шумораи зиёди собиқадорони ҷангу меҳнат, корпуси дипломатии муқими Тоҷикистон, намояндагони сершумори ҷавонону аҳли ҷамоати пойтахт ҷамъ омада, ҷузъу томҳои низомии қушунҳои ҳарбии гарнизони Душанбе ба таври идона саф оростанд.

Сарвари давлат Эмомалӣ Раҳмон дар назди ҳозирин суханронӣ намуда, солгарди 67-и Ғалабаи бузург бар фашизмро барои онҳо, кулли мардуми Тоҷикистон ва тамоми аҳолии сулҳхоҳу сулҳдӯсти ҷаҳон табрику таҳният гуфт.

Бо ёдоварӣ аз саҳми намоёни фиристодагони Тоҷикистон дар он ҷанги мудҳиш, аз ҷумла зикр гардид, ки қариб 300 ҳазор нафар фарзандони бонангу номус ва шарафманди ҷумҳурии мо ба ҷабҳа рафта, аз онҳо 100 ҳазор нафарашон дар арсаи ҷанг қаҳрамонона шаҳид шуданд.

Сипас барои арҷгузорӣ ба хотираи қаҳрамонону фидоиёни Ҷанги Бузурги Ватанӣ маросими гулчанбаргузорӣ дар назди гулхани ҷовидонӣ оғоз ёфт.

Нахуст Президенти Ҷумҳурии Тоҷикистон Эмомалӣ Раҳмон таҳти мусиқии маросимӣ ба хотири гиромидошти қурбониёни Ҷанги Бузурги Ватанӣ дар назди гулхани абадӣ гулчанбар гузошта, хотираи онҳоро пос дошт.

Гулчанбарҳо ҳамчунин аз номи Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон, Ҳукумати Ҷумҳурии Тоҷикистон, мақомоти иҷроияи маҳаллии ҳокимияти давлатии шаҳри Душанбе, Вазорати мудофиа ва дигар сохторҳои қудратӣ, собиқадорони ҷангу меҳнат, корпуси дипломатии муқими Тоҷикистон ва аз номи ҷавонон ва аҳли ҷамоати кишвар гузошта шуданд.

Хотираи неки қурбониёни ҷанги Бузурги Ватании солҳои 1941-1945 ҳамчунин бо дақиқаи хомӯшӣ пос дошта шуд.

Аз ороишҳои асосии тантанаи идонаи бахшида ба солгарди 67 Ғалаба дар Ҷанги Бузурги Ватании солҳои 1941-1945 расми гузашти низомии ҷузъутомҳои гарнизони Душанбе аз назди Президенти Ҷумҳурии Тоҷикистон, Сарфармондеҳи олии Қувваҳои Мусаллаҳ Эмомалӣ Раҳмон буд.

Дар он зиёда аз якуним ҳазор афсару сарбоз аз сохторҳои гуногуни низомии кишвар ширкат намуда, бо нишон додани маҳорати баланди сафороӣ омодагии хуби ҳарбию касбии худро собит намуданд.

Сарвари давлат Эмомалӣ Раҳмон бо собиқадорони ҷангу меҳнат ҳамчунин аз наздик сӯҳбат намуда, аз аҳволи рӯзгорашон пурсон шуд.

Собиқадорони ҷангу меҳнат ба Президенти Ҷумҳурии Тоҷикистон Эмомалӣ Раҳмон барои ғамхориҳои пайваста ба онҳо ва сиёсати созандагӣ изҳори сипос намуданд.

facebook
twitter
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
© Хадамоти матбуоти Президенти Тоҷикистон
Тел/Факс.: (+992 37)2212520