Президенти Ҷумҳурии Тоҷикистон

Сафари корӣ ба шаҳри Кӯлоб

06.09.2001 18:00, шаҳри Кӯлоб

6 сентябр Президенти Ҷумҳурии Тоҷикистон Эмомалӣ Раҳмон барои иштирок дар тантанаҳои ҷашни 10-солагии истиқлолияти Ҷумҳурии Тоҷикистон ба шаҳри Кӯлоб ташриф овард.

Сардори давлат нахуст бо ҳамроҳонаш мақбараи мутафаккири бузурги Шарқ Мир Саид Алии Ҳамадониро зиёрат кард. Сипас ба корхонаи калобаресию бофандагии муштараки Тоҷикистону Австрия "Кӯлоб-текстайлз" ташриф овард. Эмомалӣ Раҳмон кушода шудани ин корхонаро, ки дар Осиёи Марказӣ яке аз ширкатҳои дорои таҷҳизоту дастгоҳҳои навтарин мебошад, воқеаи таърихӣ номид ва зикр кард, ки тавассути кушодани чунин корхонаҳо дар манотиқи дигари кишвар, Тоҷикистон бояд аз давлати истеҳсолкунандаи ашёи хом ба давлати тавлидкунандаи маҳсулоти тайёр табдил дода шавад.

6 сентябр Президенти Ҷумҳурии Тоҷикистон Эмомалӣ Раҳмон дар чорбоғи марказии ба номи Исмоили Сомонии шаҳри Кӯлоб дар тантанаҳои идона бахшида ба 10-умин солгарди истиқлолияти давлатии Ҷумҳурии Тоҷикистон иштирок ва суханронӣ намуд.

Эмомалӣ Раҳмон зимни суханрониаш дар назди иштирокчиёни тантанаҳо ва сокинони шаҳр роҷеъ ба марҳилаҳои таърихии ҳаёти халқи тоҷик, ҷонбозиҳои ниёгон барои расидан ба файзи истиқлол ва ҳимояи хоки аҷдодӣ, эҳтиром ва эҳтиёт кардани дастовардҳои давраи истиқлолият ҳарф зад ва таъкид намуд, ки Тоҷикистон бояд имрӯз дар роҳи бунёди ҷомеаи ҳақиқатан демократӣ, ҳуқуқуқбунёд ва дунявӣ устуворона қадам занад.

Дар майдони назди чорбоғи ба номи Исмоили Сомонӣ расми гузашти тантанаи идона, консерти устодони санъат ва дастаҳои ҳунарии вилоят баргузор гардид.

Дар тантанаҳои мазкур намояндагони дипломатии кишварҳои хориҷӣ низ ширкат варзиданд.

facebook
twitter
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
© Хадамоти матбуоти Президенти Тоҷикистон
Тел/Факс.: (+992 37)2212520