2 декабр Президенти Ҷумҳурии Тоҷикистон Эмомалӣ Раҳмон Қарори Ҳукумати Ҷумҳурии Тоҷикистонро "Дар бораи тартиб ва миқдори расонидани кӯмаки яквақтаинаи моддӣ ба аҳолии аз офатҳои табиӣ зарардида дар Ҷумҳурии Тоҷикистон" ба имзо расонид.

Тибқи Қарори мазкур аз 1 январи соли 2004 ба аҳолии аз офатҳои табиӣ зарардида дар Ҷумҳурии Тоҷикистон расонидани кӯмаки моддии яквақтаина ва додани қарзи имтиёзнок дар ҳаҷми зерин муайян карда шуд: 300 сомонӣ барои ҳар як шахси фавтида; 100 сомонӣ ба сардори оила ва 50 сомонӣ ба ҳар як аъзои оила; 300 сомонӣ ба ҳар оила барои таъмири манзили истиқоматӣ, ки қисман вайрон шудааст; 1000 сомонӣ ба ҳар оила барои таъмири манзили истиқоматӣ, ки пурра вайрон шудааст; 1500 сомонӣ қарзи имтиёзнок ба мӯҳлати 5 сол ба ҳар як оила.

Мувофиқи Қарор раисони вилоят, шаҳру ноҳияҳо вазифадор гаштанд, ки дар мавриди руҳ додани ҳолатҳои фавқулодда оиди талафоти моддиву молӣ маълумотнома ва оид ба истифодаи мақсадноки маблағҳои истифодашуда ба Комиссияи давлатии Ҳукумати Ҷумҳурии Тоҷикистон оид ба ҳолатҳои фавқулодда иттилоот пешниҳод намоянд.