Президенти Ҷумҳурии Тоҷикистон

Боздид аз Қисми низомии 2133 Қӯшунҳои сарҳадии КДАМ дар ноҳияи Мир Сайид Алии Ҳамадонӣ

27.07.2016 11:21, ноҳияи Мир Сайид Алии Ҳамадонӣ

Дар идомаи сафари корӣ ба ноҳияи Мир Сайид Алии Ҳамадонӣ Президенти Ҷумҳурии Тоҷикистон Эмомалӣ Раҳмон аз Қисми низомии 2133 Қӯшунҳои сарҳадии Кумитаи давлатии амнияти миллии Ҷумҳурии Тоҷикистон дидан намуд.

Аснои боздид дар Отряди сарҳадии «Ҳамадонӣ» Сарфармондеҳи олии Қувваҳои мусаллаҳи мамлакат, нахуст бо низоми фаъолият дар ин отряди муҳими сарҳадӣ, ки дорои тамоми ҷузъу томҳои муосири марзбонӣ ва дидбонгоҳҳои навбудёду замонавӣ мебошад шиносоӣ пайдо намуд.

Дар Отряди сарҳадии «Ҳамадонӣ» ба роҳбари давлат- Сарфармондеҳи олии Қувваҳои мусаллаҳи Ҷумҳурии Тоҷикистон ҳамзамон осорхонаи таърихӣ бо дастовардҳои замони соҳибистиқлолӣ муаррифӣ гардида, дар он аз руи марҳилаҳои ташаккул то ба мукаммалгардонии сипари боэътимоди миллӣ, ки имрӯз номи Қушунҳои сарҳадиро соҳиб аст намоиш дода шуд.

Отряди сарҳадии «Ҳамадонӣ», ки имрӯз ҳифозат ва таъмини амниятро дар масофаи 106.3 километр хати марзӣ бардӯш дорад, бо тамоми имконоти муосири назоратӣ ва техникаву лавозимоти ҷангӣ муҷаҳҳаз буда, барои ҳайати шахсӣ, афсарони сарбозони моҳири ин ниҳод дар ҳудуди Қисми низомии 2133 шароити зарурии зист муҳайё карда шудааст.

Дар рафти боздид аз Отряди сарҳадии «Ҳамадонӣ» Сарвари давлат бевосита бо шароиту сифати будубоши афсарон ва фаъолияти хобгоҳу утоқҳои корӣ шиносоӣ пайда намуда, бо изҳори хушнудӣ барои боз ҳам беҳтару хубтар муҳайё намудани шароити хизматӣ тавсеаҳои муфид дод.

Баъди сӯҳбати самимӣ бо афсарону сарбозони моҳири Қушунҳои сарҳадии Кумитаи давлатии амнияти миллӣ, дар ҳузури Асосгузори сулҳу Ваҳдати миллӣ-Пешвои миллат, Сарфармондеҳи олии Қувваҳои мусаллаҳи Ҷумҳурии Тоҷикистон Эмомалӣ Раҳмон бо иштироки хизматчиёни ҳарбии ҷузъу томҳои Қушунҳои сарҳадӣ ва отряди таъиноти махсуси милитсияи кишвар гузашти низомӣ ва намоиши техникаҳои ҳарбӣ доир гардид.

Дар оғоз Сарфармондеҳи Олии Қувваҳои мусаллаҳи Ҷумҳурии Тоҷикистон Эмомалӣ Раҳмон ҳамаи хизматчиёни ҷузъу томҳои Қушунҳои сарҳадиро ба ифтихори 25-умин солгарди Истиқлолияти давлатӣ табрику таҳният гуфта, онҳоро ба хизмати содиқонаи халқу Ватан ва савганди ҳарбӣ ҳидоят намуд.

Дар ин рӯз дар майдони ҳавоии Отряди сарҳадии «Ҳамадонӣ» ҳамзамон техникаҳои зиреҳпӯши ҷангию нақлиётӣ, артиллерияҳои худгард, навъҳои мухталифи туб ва дигар лавозимоти ҷангии муосир дар маҷмуъ 20 номгуӣ техникаи ҳарбӣ ба намоиш гузошта шуд.

Имрӯз масъулияти асосии пурзур намудани назорат дар минтақаҳои масъулиятноки кишвар бар дӯши сарҳадбонони тоҷик вогузор буда, тамоми минтақаи сарҳадӣ бо дидбонгоҳ ва постгоҳҳои муосиру муҷаҳҳаз таъмин аст, ки низоми фаъолияти онҳо ба стандарҳои байналмиллалӣ мутобиқ мебошанд.

Ёдовар мешавем, ки масъулияти ҳифзи марзи кишвар дар минтақаи Ҳамадонӣ соли 2005-ум пурра бар уҳдаи сарҳадбонони Отряди сарҳадии «Ҳамадонӣ» вогузор гардида, он то ба имрӯз чун сипари боэътимод ва пуриқтидори давлату миллат фаъолият дорад.

facebook
twitter
Хабарҳо
Ҳамаи хабарҳо
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
Харита
© Хадамоти матбуоти Президенти Тоҷикистон
Тел/Факс.: (+992 37)2212520