15 апрел Президенти Ҷумҳурии Тоҷикистон Эмомалӣ Раҳмон "Оид ба механизми танзими қарзи корхонаю ташкилотҳои кишоварзии аз нав ташкилшуда ва дар ҳолати аз нав ташкилдиҳӣ қарордошта" фармон имзо кард.

Фармони мазкур бо мақсади суръатбахшии ҷараёни ислоҳоти кишоварзӣ ва мусоидат ба рушди иқтисоди миллӣ интишор гашта, муқаррар менамояд, ки қарзи корхонаю ташкилотҳои кишоварзии аз нав ташкилшуда ва таҳти аз навташкилдиҳӣ қарордошта байни хоҷагиҳои деҳқонӣ (фермерӣ) ва хоҷагиҳои дар дигар шаклҳои ташкили хоҷагидории дар асоси онҳо ташкилшаванда мутаносибан ба ҳиссаи қитъаи замини гирифтаашон тақсим мегардад.

Дар фармон инчунин оиди ба танзим даровардани ӯҳдадориҳои қарзии корхонаю ташкилотҳои кишоварзӣ баён гардида, ба Ҳукумати Ҷумҳурии Тоҷикистон ва Бонки миллӣ супориш дода шудааст, ки бобати гурӯҳбандӣ, реструктуризатсия ва нисбати қарзҳои беъэтимод (бебозгашт) бо тартиби муқарраргардида қарорҳои дахлдор қабул намоянд.