10 ноябр Президенти Ҷумҳурии Тоҷикистон Эмомалӣ Раҳмон аз Сафири нави Фавқулодда ва Мухтори Швейтсария дар Ҷумҳурии Тоҷикистон Петер Бургхард эътимоднома қабул кард.

Сипас дар ҷараёни сӯҳбати пурмуҳтавою созанда маҷмӯи васеи масъалаҳои ҳамкорӣ дар соҳаҳои иқтисодию тиҷоратӣ ва илмию техникӣ баррасӣ гардиданд.

Бо ёдоварӣ аз фаъолияти самараноки Дафтари душанбегии Агентии Швейтсария оид ба рушду ҳамкорӣ Президенти Ҷумҳурии Тоҷикистон Эмомалӣ Раҳмон таъкид кард, ки сол то сол муносиботи дуҷониба бобарору қавитар мегардад.

Робитаҳои дуҷониба, ба хусус, дар бахши саҳмгирии муштараки ҳалли мушкилоти глобалӣ, яъне ташкилу баргузории форуми душенбегии оид ба оби тоза дар соли 2003 ва ташаббуси ҷониби Тоҷикистону ҳаммуаллифии Швейтсария доир ба даҳсолаи амалиёти «Об барои ҳаёт», ки Ассамблеяи Генералии СММ эълон дошт, ифодагари талошҳои устувори ҳар ду тараф мебошад, зикр гардид дар вохӯрӣ.

Зимни сӯҳбат тазаккур дода шуд, ки алҳол дар Ҷумҳурии Тоҷикистон марҳилаи инкишофи эътимодбахши иқтисодиёти миллӣ фаро расидааст. Болоравии ҳаҷми истеҳсоли маҳсулоти дохилӣ, таҷдиди сиёсати андозу гумрук, таъмини шароитҳои озоди рушди иқтисодию тиҷоратӣ ва ҷалби сармояи хориҷӣ, дар ҳамин замина афзоиши содироту воридоти мол собит менамояд, ки Ҳукумати Ҷумҳурии Тоҷикистон сиёсати дуруст ва ояндадори иқтисодиро амалӣ карда истодааст.

Аз ҷумла, дар соли гузашта гардиши мол миёни Ҷумҳурии Тоҷикистон ва Швейтсария 80 млн. доллари ИМА ва дар нӯҳ моҳи соли ҷорӣ 60 млн. доллари амрикоро ташкил дод.

Дар мулоқот дар мавриди дарёфти роҳҳои нави инкишофи робитаҳои дутарафаи иқтисодӣ андешаҳои судманд баён гардида, ҳамзамон атрофи доираи фарохи масъалаҳои минтақавию ҷаҳонӣ табодули назар сурат гирифт.