1 ноябр Президенти Ҷумҳурии Тоҷикистон Эмомалӣ Раҳмон аз Сафири Фавқулодда ва Мухтори Канада дар Ҷумҳурии Тоҷикистон Анна Биолик эътимоднома қабул кард.

Баъди анҷоми маросими эътимодномасупорӣ мулоқот баргузор шуд, ки дар он маҷмӯи васеи ҳамкориҳои миёни Ҷумҳурии Тоҷикистон ва Канада дар бахшҳои иқтисодиёту тиҷорат баррасӣ гардиданд.

Мо ба вусъати ҳамкориҳо бо Канада, - изҳор дошт Сарвари давлати Тоҷикистон Эмомалӣ Раҳмон, -таваҷҷӯҳи хоса дорем, зеро дар доираи коалитсияи зиддитеррористӣ мо робитаҳои устувор барқарор намудаем.

Ҷонибҳо дар мавриди таҳкими муносибати дуҷониба, аз ҷумла ҷалби сармоя ба иқтисодиёти Ҷумҳурии Тоҷикистон ва иштироки муштарак дар азхудкунии захираҳои энергетикии Ҷумҳурии Тоҷикистон ҳамфикрӣ баён доштанд.

Дар вохӯрӣ тазаккур дода шуд, ки саҳмгирӣ дар марҳилаи барқарорсозии иқтисодии Афғонистон на танҳо ба пешрафти робитаҳои иқтисодию тиҷоратии тарафҳо, балки барои фароҳам овардани заминаҳои боэътимоди амнияту осоиши минтақа ва ҷаҳон, пешгирӣ ва мубориза алайҳи гардиши қайриқонунии маводи мухаддир ва барҳам додани сарчашмаҳои молиявии инкишофи терроризми байналмилалӣ мусоидат хоҳад кард.

Дар мулоқот инчунин атрофи дигар масъалаҳои дорои хусусиятҳои минтақавию байналмилалӣ табодули назар карда шуд.