Нимаи дуюми рӯзи 14 сентябр Президенти Ҷумҳурии Тоҷикистон Эмомалӣ Раҳмон бо Роҳбари Ҳукумати Интиқолии Афғонистон Ҳамид Карзай, Сарвазири Ҷумҳурии Исломии Покистон Шавкат Азиз, ки бо мақсади иштирок дар мулоқоти ҳаштуми Сарони кишвар ва Ҳукуматҳои мамолики узви ЭКО ба Тоҷикистон омада буданд, мулоқот кард.

Дар вохӯрии сеҷониба мавзӯи васеи масъалаҳои дахлдори робитаҳои иқтисодию тиҷоратии миёни Тоҷикистону Афғонистон ва Покистон баррасӣ шуданд.

Истифодаи самараноки захираҳои фаровони обии Ҷумҳурии Тоҷикистон, - изҳор дошт Эмомалӣ Раҳмон, - на танҳо эҳтиёҷоти кишварҳои минтақаро таъмин менамояд, балки барои фурӯши нерӯи барқ заминагузорӣ хоҳад кард.

Аз ҷумла, татбиқи лоиҳаи иншооти стратегии нерӯгоҳҳои Роғун ва Сангтӯда барои вусъати марҳилаи барқарорсозии иқтисодии Афғонистон такони нав бахшида метавонад.

Мусоҳибон зарурати бунёди роҳи мошингарди миёни Ҷумҳурии Тоҷикистон ва Ҷумҳурии Исломии Покистонро ҳамчун ҳадафи марказии роҳбарони олимақоми кишварҳо таъкид сохтанд.

Дар мулоқот ба мавзӯъҳои фарогири амнияти минтақавӣ, мубориза алайҳи таҳдидҳои хатарноки глобалӣ, барҳам задани манбаи асосии рушди терроризми байналмилалӣ, яъне истеҳсол ва хариду фурӯши маводи мухаддир табодули назар карда шуд.