19 август Президенти Тоҷикистон Эмомалӣ Раҳмон ба унвони Ҳомид Карзай Раиси Давлати Интиқолии Исломии Афғонистон барқияи шодбошӣ фиристод, ки дар он аз ҷумла омадааст: - Боиси сарфарозӣ мебошад, ки Ҷалолатмаоб ва дар шахси Шумо мардуми Афғонистони ҳамҷаворро ба муносибати фаро расидани солгарди ҷашни фархундаи истиқлол самимона табрик ва таҳният гӯям.
Бо истифода аз ин фурсати фараҳбахш ва таҷдиди ҷонибдорӣ аз талошҳои Давлати Интиқолии Исломӣ таҳти роҳбарии Шумо ҷиҳати барқарор намудани сулҳу суботи пойдор ва бунёди ҷомеаи озод ва демократӣ дар кишвари дӯст ва ҳамсоя, омодагии Тоҷикистонро барои таҳкими минбаъдаи муносибатҳои анъанавӣ ва ҳамкориҳои мутақобилан судманд бо Афғонистон изҳор менамоям.
Ба Ҷалолатмаоб саломатии қавӣ ва пирӯзиҳо ва ба мардуми бародари Афғонистон комёбиву хонаободӣ таманно дорам.