26 июл Президенти Ҷумҳурии Тоҷикистон Эмомалӣ Раҳмон аз Сафири Фавқулодда ва Мухтори Ҷумҳурии Чехия дар Ҷумҳурии Тоҷикистон Алеш Фойтик эътимоднома қабул кард.

Дар вохӯрии баъди маросими расмии эътимодномасупорӣ Президенти Ҷумҳурии Тоҷикистон Эмомалӣ Раҳмон Алеш Фойтикро ба ифтихори оғози фаъолияти дипломатӣ дар Ҷумҳурии Тоҷикистон шодбош гуфта, дар таҳкими муносиботи дуҷонибаи Тоҷикистону Чехия ба ӯ муваффақият таманно кард.

«Тоҷикистон дар мавриди вусъати ҳамкориҳо ба мамолики Аврупои Шарқӣ ба хусус бо Чехия манфиатдор аст»,- таъкид намуд Эмомалӣ Раҳмон.      Сарвари давлати Тоҷикистон бо изҳори қаноатмандӣ аз сатҳи кунунии ҳамкориҳо, ки барои инкишофи робитаҳои иқтисодию тиҷоратӣ миёни Ҷумҳурии Тоҷикистон ва Ҷумҳурии Чехия заминаи устувор мегузорад, зикр кард, ки муносиботи ба ҳар ду ҷониб манфиатнок аз созишномаҳои соли 1993 ба имзо расида сарчашмаи амиқ гирифтанд.

Ҷонибҳо атрофи масъалаҳои рушди ҳамкорӣ, ба хусус дар ҷодаи саҳмгирӣ дар сохтмони нерӯгоҳи Сангтӯда тариқи воридшавӣ ба консорсиуми байналмилалӣ, инчунин коркарди зироатҳои кишоварзӣ, саноати сабук, хӯрокворӣ ва пӯст мубодилаи афкори судманд намуданд.

Дар вохӯрӣ изҳори умед карда шуд, ки даҳсолаи нави ҳамкориҳои Тоҷикистону Чехия марҳилаи комилан пурсамари татбиқи амалии лоиҳаҳои муштарак хоҳад буд, зеро фазои боварибахши ҷалби сармоя мавҷуд аст ва талоши ҳар ду ҷониб ҷиҳати таҳкими робитаҳо вусъат пайдо мекунад.