24 июл Президенти Ҷумҳурии Тоҷикистон Эмомалӣ Раҳмон ба роҳбари Дастгоҳи иҷроияи Президенти Ҷумҳурии Тоҷикистон Маҳмадназар Солеҳов, мушовирони давлатии Президенти Ҷумҳурии Тоҷикистон ва масъулини Дастгоҳи иҷроияи Президент бо натиҷагирӣ аз сафарҳои корӣ ба ВМКБ, вилоятҳои Суғду Хатлон бобати таҳияи маҷмӯи нақшаи чорабиниҳо дастуру супоришҳо дод.
Сарвари давлат таъкид намуд, ки дар ҷараёни сафарҳои корӣ баробари пешравиҳо дар соҳаҳои мухталифи ҷомеа як қатор камбудиҳо ошкор гардиданд, ҳамзамон дар сӯҳбатҳо шаҳрвандон таклифу дархости зиёд пешниҳод намуданд. Президенти Ҷумҳурии Тоҷикистон Эмомалӣ Раҳмон супориш дод, ки бо мақсади амалӣ намудани тадбирҳои саривақтӣ, инчунин таҳияи лоиҳаи бунёди иншоотҳои хурду бузурги истеҳсолию соҳаҳои маорифу тандурустӣ дар шаҳру навоҳии мухталифи ҷумҳурӣ, аз ҳисоби масъулини Дастгоҳи иҷроияи Президенти Ҷумҳурии Тоҷикистон ва вазорату идораҳои ҷумҳуриявӣ ҳайати корӣ ва гурӯҳи экспертӣ барои омӯзиши имкониятҳои татбиқи лоиҳаҳо созмон дода шавад.
Татбиқи бетаъхири нақшаи чорабиниҳо вобаста ба натиҷаҳои сафари кории Сарвари Давлат ба Вилояти Мухтори Кӯҳистони Бадахшон, вилоятҳои Суғду Хатлон таҳти назорати қатъии Президенти Ҷумҳурии Тоҷикистон қарор мегирад.