24 май Президенти Ҷумҳурии Тоҷикистон Эмомалӣ Раҳмон ба унвонии Сарвазири Ҷумҳурии Ҳиндустон Манмоҳан Сингҳ номаи шодбошӣ ирсол намуд, ки дар он аз ҷумла чунин омадааст:

«Ба муносибати ба мансаби олии Сарвазири Ҷумҳурии Ҳиндустон таъин шуданатон табрику таҳнияти маро қабул фармоед.

Тоҷикистон муносибатҳои ҳамкориро бо Ҳиндустон, ки на фақат ба манфиати миллии ҳар ду мамлакат мувофиқанд, балки омили муҳими сулҳу оромии минтақа низ мебошанд, хеле қадр мекунад. Мо азму иродаи қавӣ дорем, ки ҳамкории ҳамаҷонибаи Тоҷикистону Ҳиндустонро ба манзури рушду тараққии мамлакатҳо ва беҳбудии халқҳоямон минбаъд ҳам таҳким бахшем.

Аминам, ҳамкории зичу ҳамаҷонибаи Тоҷикистону Ҳиндустон дар заминаи принсипҳои баробарҳуқуқӣ, эҳтироми якдигар ва ба назар гирифтани манфиати ҳар ду давлат боз ҳам рушду густариш меёбанд.

Иҷозат диҳед ба Шумо, ҷаноби Сарвазир, тансиҳатию барори кор ва ба халқи дӯсти ҳинду сулҳу шукуфоӣ таманно намоям».